Часовы павераны ў справах ЗША Ітан Голдрыч пакідае Менск

Часовы павераны ў справах ЗША ў Беларусі Ітан Голдрыч завяршае сваю працу ў Менску.

Як стала вядома БелаПАН, дыпламат пакіне Беларусь у канцы чэрвеня. Імя новага кіраўніка амерыканскай дыпмісіі пакуль не называецца.

Ітан Голдрыч быў прызначаны часовым павераным у справах ЗША ў Беларусі летам 2012 года. Да прызначэння ў Менск ён займаў пасаду дырэктара ўпраўлення па справах Каўказа і рэгіянальных канфліктаў бюро па еўрапейскіх і еўразійскіх справах Дзярждэпартамента.

Нагадаем, пасада амбасадара ЗША ў Беларусі застаецца вакантнай з сакавіка 2008 года, пасля дыпламатычнага канфлікту паміж Менскам і Вашынгтонам. Падставай для канфлікту сталі санкцыі ЗША ў дачыненні да канцэрна "Белнафтахім", уведзеныя ў сувязі з парушэннямі правоў чалавека ў Беларусі. Неўзабаве пасля гэтага амбасадар Беларусі ў ЗША Міхаіл Хвастоў быў адкліканы з Вашынгтона для кансультацый, а Менск па патрабаванні беларускага боку пакінула амбасадар Карэн Сцюарт. Колькасць амерыканскіх дыпламатаў у Менску па патрабаванні беларускага боку было скарочаная з 35 да пяці супрацоўнікаў.