Махляр з Рэчыцы пераканаў 11 гамельчукоў купіць яму тэлефоны і планшэты

Вынесены чарговы прысуд 23-гадоваму жыхару Рэчыцы, які меў прысуды ўжо восем разоў.

Ён падмануў ва ўсякім разе 11 гамельчукоў. Новых схем не выдумляў. Знаёміўся, тлумачыў, што яму тэрмінова патрэбен дарагі тэлефон ці іншы дэвайс, і прасіў новага знаёмага аформіць крэдыт на сябе - за невялікае ўзнагароджанне або проста ад чыстага сэрца, піша onliner.by.

Пра пачатак гэтай гісторыі журналісты распавядалі ў сакавіку. Тады ў УУС паведамілі, што разглядаецца шматэпізодная справа ў дачыненні да маладзёна, які ў студзені - кастрычніку 2013 дзейнічаў у кропках аператараў сотавай сувязі. Электроніку для яго купляла ў асноўным моладзь.

Пра абставіны справы распавёў старэйшы памочнік пракурора Гомеля Кірыл Вышнякоў, які выступаў дзяржабвінаваўцам у судзе першай інстанцыі. Жыхар Рэчыцы жыў у Гомелі ў здымнай кватэры. Новым знаёмым тлумачыў, што сам не можа аформіць куплю, паколькі «закрэдытаваны». Абяцаў, што ўсе пагасіць.

Праз некаторы час банкі пачыналі цікавіцца ў дабрадзеяў, дзе грошы. Да гэтага моманту сляды хлопца губляліся, электроніка даўно была перапрададзеная, прыбытак выдаткаваны, рабілася апрацоўка наступнага «кліента». На 11 пацярпелых прыпадае сума у 113 млн рублёў.

Прысуд суда першай інстанцыі - 5 гадоў пазбаўлення волі ў калоніі строгага рэжыму з канфіскацыяй маёмасці.