Ангела Мэркель: Нямеччына не заклікала да перамоваў з баевікамі
39- 15.07.2014, 9:10
- 19,528
Канцлерка Нямеччыны заявіла аб няправільным тлумачэнні выказвання прадстаўніка ўрада аб наўпроставых перамовах з сепаратыстамі.
Пра гэта Ангела Мэркель паведаміла падчас тэлефонных кансультацыі з прэзідэнтам Украіны Пятром Парашэнкам. Суразмоўцы абмеркавалі шляхі арганізацыі сустрэчы Трохбаковай кантактнай групы, у прыватнасці, у фармаце відэа-канферэнцыі, і выказалі ўпэўненасць, што гэта мерапрыемства будзе арганізаванае ўжо заўтра.
Пра гэта паведамляе прэс-служба прэзідэнта Украіны.
Канцлерка зрабіла акцэнт на няправільным тлумачэнні выказвання прадстаўніка Федэральнага ўрада аб наўпроставых перамовах з сепаратыстамі і выказала прыхільнасць ідэі кансультацый Трохбаковай кантактнай групы.
Стораны абмеркавалі пытанні прыцягнення місіі АБСЕ да маніторынгу і верыфікацыі мяжы. Гаворка ідзе аб размяшчэнні інспектараў АБСЕ на ўкраінска-расейскай мяжы, у тым ліку на расейскіх кантрольна-прапускных пунктах «Данецк» і «Гукава», а таксама аб магчымасці ўжывання беспілотных сродкаў для маніторынгу і верыфікацыі.
Парашэнка і Мэркель таксама абмеркавалі падрыхтоўку да разгляду ўкраінскай праблематыкі на пасяджэнні Еўрапейскай Рады 16 ліпеня ў Брусэлі.
Раней прэс-служба ўрада Нямеччыны паведаміла, што Ангела Мэркель нібыта падтрымала наўпроставыя перамовы з тэрарыстамі.