Навукоўцы не бачаць нічога загадкавага ў гіганцкім паноры на Ямале (Відэа)

Велізарны панор - гэта вынік нейкага прыроднага з'явішча.

Навукоўцы правялі першаснае даследаванне гіганцкага панору ў Ямала-Нянецкай аўтаномнай акрузе, ролік з якім паглядзелі ў Сеціве больш за два мільёны разоў, і наважылі, што ён мае прыроднае паходжанне і не з'яўляецца наступствам якога-небудзь тэхнагеннага ўздзеяння або падзення метэарыта, паведамляе сайт урада рэгіёну.

Ніякіх небяспечных выпраменьванняў на месцы панору навуковая група, накіраваная на месца праявы на даручэнне губернатара ЯНАА Дзмітрыя Кабылкіна, не выявіла. Навукоўцы прыйшлі да высновы, што панор - гэта вынік "нейкага прыроднага з'явішча, даць вызначэнне якому цяпер, без дэталёвага даследавання, немагчыма", гаворыцца ў паведамленні, піша NEWSru.com.

"Наземнага ўплыву тут няма, - падаюцца ў прэс-рэлізе словы ўдзельніцы групы, галоўнай навуковай супрацоўніка Інстытута крыясфэры Зямлі Сібірскага аддзялення РАН Марыны Лейбман. - Старанны агляд паказаў, што ніякіх слядоў прысутнасці чалавека з тэхнікай не было. Здагадкі аб гарачым метэарыце таксама беспадстаўныя, тады мусілі б быць сляды асмальвання".

"На гэтым месцы быў выкід некаторага матэрыялу з нетраў зямлі, - сцвярджае навукоўка. - Я не думаю, што ён суправаджаўся выбухам, бо пры гэтым чакаецца ўздзеянне высокіх тэмператур. Гэта спрэс механічны выкід, які, мабыць, адбыўся праз падвышэнне ціску пры прамярзанні і змене аб'ёму некаторай паражніны, у якой былі запасы балотнага газу ".

Дыямэтар панору ва ўнутранай закраіне - пад 40 мэтраў, у вонкавай - 60, а фрагмэнты выкіду назіраюцца на адлегласці 120 мэтраў, паведаміў іншы ўдзельнік даследавання, старшы навуковы супрацоўнік ДКУ ЯНАА "Навуковы цэнтр вывучэння Арктыкі" Андрэй Пляханаў.

Для таго каб сапраўды вызначыць глыбіню, патрэбныя спецыялісты з дыхтоўным альпінісцкім рыштункам, адзначыў спецыяліст, папярэдзіўшы, што падыходзіць блізка да панору небяспечна для жыцця, бо закраіны ўтворанага насыпу рэгулярна абсыпаюцца.

У прэс-службе кіраўніка рэгіёну таксама паспяшаліся супакоіць, што ў выпадку з гэтым панорам гаворка дакладна не ідзе аб тэхнагенным уздзеянні або падзенні метэарыта. "Пра выбух як такі таксама гаворка не вядзецца. Навукоўцы больш схіляюцца да фармулёўкі "лопнула, як бурбалка", - паведамілі "Інтэрфаксу" ў прэс-службе.

"Навукоўцы кажуць, што панор суздром бяспечны для насельніцтва і не перашкаджае здабычы газу на тэрыторыі акругі, асабліва ўлічваючы, што ў наваколлі, прынамсі, на дзясяткі кіламэтраў, няма прамысловых аб'ектаў", - адзначыў суразмоўца агенцтва.

Відэа з гіганцкім панорам з'явілася ў інтэрнэце 10 ліпеня. У апісанні да роліка ягоны аўтар, які зняў панор падчас палёту на гелікоптэры, паведамляў, што ён утварыўся ў 30 кіламэтрах ад Баваненскага радовішча, а яго памер гэткі велізарны, што "можна ў яго спускацца на некалькіх Мі-8, не асцерагаючыся нешта закрануць".

На роліку відаць, што панор атачае расліннасць, і можна заўважыць, што грунт вакол яго быў выкінуты вонкі, як зазвычай здараецца пры выбуху. У той жа час адзначаецца, што ў гэтым раёне ніякіх даследчых работ не праводзілася.