На выходных ДАІ паедзе ў клубы

19 і 20 ліпеня Дзяржаўтаінспекцыя працуе ва ўзмоцненым рэжыме.

Увага - на хуткасць, абгон, пешаходныя пераходы і матацыклы.

Трагедыя можа адбыцца нават, здавалася б, на пустым месцы. Шкада, што паведамленні ДАІ пацвярджаюць гэта ледзь не штодня. Учора, 17 ліпеня, на дарогах краіны загінулі двое, піша «Ежедневник».

32-гадовы матацыкліст без шалома і пасведчання кіроўцы, якога пазбавіўся за п'янае кіраванне, ноччу адправіўся ў паездку на матацыкле «Ява» па г.п. Азарычы Калінкавіцкага раёна. Не справіўшыся з кіраваннем, ён з'ехаў на абочыну і рэзнуўся ў дрэва. Вынік - смерць на месцы здарэння.

У пачатку вечара 8-гадовая дзяўчынка наважыла перайсці 23 км аўтадарогі Менск-Мікашэвічы паблізу в. Беліца - і была збітая кіроўцам Ford Focus, які не заўважыў, што аўтамабілі, якія рухаліся ў спадарожным кірунку, пачалі гамаваць, прапускаючы пешахода.

Спрабуючы выратаваць хоць бы адно жыццё, Дзяржаўтаінспекцыя ўзмацняе працу на выходных. На паведамленне ДАІ МУС, асаблівую ўвагу на гэты раз звернуць на кіроўцаў мотатранспарту.

У начны час інспектары паедуць у рэйды па месцах, дзе весяліцца моладзь - клубах, лесапаркавых зонах, начным крамах. Усё гэта - з мэтай спынення парушэнняў правілаў дарожнага руху, у тым ліку кіроўцамі матацыклаў і мапедаў.

Удзень увага на зоны адпачынку.

Спецпадраздзяленне ДПС «Страла» будзе адпрацоўваць Івацэвіцкі, Пружанскі, Слонімскі, Нясвіжскі і Стаўбцоўскі раёны.