«Пад Грунвальдам і нашы і палякі біліся з Тадэвушам Касцюшкам»

Менчукі - аб Грунвальдскай бітве.

15 ліпеня 1410 аб'яднанае войска Вялікага княства Літоўскага і Каралеўства Польскага здабыла адну з самых гучных перамог сярэднявечча. «Камсамольская праўда ў Беларусі» высветліла, што сёння памятаюць пра гэта жыхары сталіцы.

Яўген:

-Немцы ... германцы ... тэўтонцы! Ну і ВКЛ.

- А ў якім годзе яна адбылася?

- Тысяча чатырыста нейкі, 1468?

Аляксандр Міхайлавіч:

- Нашы і палякі, а з кім? Ці не з Тадэвушам Касцюшкам?

Студэнтка Юлія:

У Грунвальдскай бітве змагалася мноства народаў. Грунвальд - гэта ў Нямеччыне, а значыць, былі тэўтоны і, мабыць, ваявалі яны супраць славян.

Іван Станіслававіч:

- З аднаго боку біліся тэўтоны, а з другога - беларуска-польскае войска. На маёй радзіме, у Ваўкавыску, нават помнік гэтай бітве стаіць. Я яго бачыў, але вось год неяк не запомніў, можа 1412?

Ціхан, яго мама і Леў Талсты:

- Рэальна сорамна, але не памятаем.

Адзінаццацікласніцы Анастасія і Саіда:

- Тэўтонскі ордэн супраць аб'яднанага войскі ВКЛ і Польшчы. На чале ВКЛ стаяў Вітаўт, а польскім войскам кіраваў Ягайла.

- А імя камандуючага Тэўтонскім ордэнам ўспомніце?

- Ульрых Фон Гютэнгэн... Фон Юнгінгэн!

- А год?

- 1410

- Можа быць, і дату назавяце?

- У ліпені ... 15 ліпеня!

Беларус Мікіта і расеяц Данііл:

- Немцы і Палякі. А падрабязнасцяў успомніць не зможам.

Вельмі разумны мужчына з дзіцем:

- 15 ліпеня 1410 Тэўтонскі ордэн пад камандаваннем Ульрыха фон Юнгінгэна змагаўся з аб'яднанай арміяй Польшчы і ВКЛ пад кіраўніцтвам Ягайлы і Вітаўта.

***

Грунвальдская бітва - вызначальны паядынак «Вялікай вайны», у якім войскі Тэўтонскага ордэна сустрэліся з аб'яднанай арміяй Польшчы і ВКЛ. Бітва адбылася 15 ліпеня 1410 на полі каля вёсак Грунвальд, Людвігсдарф і Таненбэрг.

У войска ВКЛ уваходзілі блізу 12 000 воінаў, Польшча выставіла прыблізна столькі ж. Арміяй ВКЛ кіраваў Вітаўт, а на чале польскага войска стаяў Ягайла. На баку Тэўтонскага ордэна пад кіраўніцтвам Ульрыха фон Юнгінгэна змагалася прыблізна 18 000 салдат.

Падчас бітвы тэўтонцы былі разбітыя, а іх магістр Ульрых фон Юнгінгэн забіты. Ордэн не змог перанесці гэты зруйнавальны разгром і праз 56 гадоў цалкам прызнаў сябе васалам польскага караля.

ВКЛ жа пасля перамогі над крыжакамі стала адной з вядучых дзяржаў сярэднявечнай Еўропы.