Менчукі: Не можам сабе дазволіць сёмгу, тунец і «Рафаэла»
35- 21.07.2014, 15:30
- 29,272
Журналісты высветлілі ў менчукоў, аб якіх прадуктах яны цяпер толькі мараць.
Кошт прадуктаў з пачатку года павялічыўся на 13,8%. «Комсомольская правда в Беларуси» наважыла высветліць, як гэта адбілася на апетытах менчукоў. Журналісты запыталіся ў мінакоў: «Якія прадукты вы не можаце сабе дазволіць?»
Алег, педагог з Берасця:
- Не магу дазволіць многае. Напрыклад, калі чырвоную ікру часам ем, то ў чорнай сабе адмаўляю. Сёмгу, тунца таксама дазволіць сабе не магу, і балык, і яшчэ цукеркі «Рафаэла».
Марк Іосіфавіч, стаматолаг з 40-гадовым стажам:
- Самае галоўнае - не магу сабе дазволіць экалагічна чыстыя прадукты. Таму што іх проста няма! Часам езджу да фермера, бяру ў іх ялавічыну парную, сыры сапраўдныя і гародніну свежую. Але і там ёсць пэўныя сумневы ў якасці. Калі ў Еўропе бываю - фуа-гра сабе дазваляю, чаго ўжо там!
Марыя, студэнтка БДУ:
- Напэўна, з таго, што люблю, магу дазволіць сабе ўсё. Іншая рэч - дэлікатэсы на святочны стол, іх кожны дзень купляць не зможаш.
Ніна Рыгораўна з унучкай:
- Сёмгу люблю, але яна занадта дарагая. А вось чырвоную ікру зусім нядаўна ела: мне яе з-за мяжы прывезлі.
Сяброўкі Марына і Яна:
- У прынцыпе, такіх прадуктаў няма, ну хіба што марцыпаны. А ўсе самыя дарагія ягады можна сарваць ў бабулі на лецішчы.
Вольга:
- Чырвоную рыбу, сёмгу. З садавіны - манга. Ананасы купляю толькі на зніжках.
Маладыя бацькі Аляксандр і Ганна:
- Многія морапрадукты цяпер вельмі дорага каштуюць. Ды і ананасы таксама не заўсёды бярэм.
Алена і Ларыса з дзецьмі:
- У нас ужо ўсё дорага: і мяса падаражэла, і хлеб, а пра морапрадукты наогул казаць няма чаго.
Аляксей, архітэктар:
- У асноўным гэта морапрадукты, каралеўскія крэветкі, напрыклад. Але якасная ежа заўсёды дорага каштуе. А вось наконт садавіны не скарджуся: купляю ўсё, што хачу.
Глеб, Станіслаў, Канстанцін, абітурыенты БДУІРа:
- Вядома, вось на мінулым тыдні падаражэў кумпяк аднарога. Тым не менш, хоць я і харчуюся толькі казачнай ежай, магу выказаць здагадку, што многія цяпер не могуць дазволіць сабе крэветкі і каўбасу салямі. Яшчэ прыкметна падаражэла свініна і мармуровая ялавічына.