Сумар: Відавочна, у нас катаклізмы ў галовах

Самакрытычная заўвагу прагучала на пасяджэнні Берасцейскага аблвыканкама.

У самым пачатку асноўнага дакладу, што папярэднічаў дыскусіі, намеснік старшыні выканкама Андрэй Клец выказаўся аб развіцці эканомікі ў першым паўгоддзі недвухсэнсоўна: "тэндэнцыя адмоўная". Пазітыўная дынаміка першага квартала відавочна пайшла на змяншэнне у другім. Толькі зачын першых трох месяцаў дазволіў больш-менш звесці канцы з канцамі па паўгоддзі. Валавы рэгіянальны прадукт вырас на 2,6% пры прагнозе 1,2%. Рост сярэдняга заробку, хоць і запаволіўся, таксама ўкладаецца ў прагнозныя параметры. А вось экспарт тавараў і паслуг пакуль не дацягвае да прагнозу. Не ўдалося забяспечыць і рост аб'ёмаў прамысловай вытворчасці (98% пры заданні 101,5%). У інвестыцыях у асноўны капітал дык і зусім мінус у параўнанні з аналагічным перыядам 2013 года, піша "Вечерний Брест".

Выступоўца на абласным выканкаме намеснік міністра прамысловасці Генадзь Свідэрскі патлумачыў гэта грувасткай структурай вытворчасцей і стратай імі традыцыйных рынкаў збыту. У прыватнасці, попыт на нашыя тавары ва Украіне рэзка знізіўся ў выніку нашумелых падзей і ўвядзення дадатковых мытаў украінскім бокам.

Насцярожвае кіраўніцтва вобласці і шматгадовая тэндэнцыя зніжэння прыбытковасці вытворчасцяў. Так, са слоў кіраўніка рэгіёну Канстанціна Сумара, чысты прыбытак прамысловасці Пінска меншы, чым у Ганцавіцкім раёне. А многія прадпрыемствы вобласці на кожны рубель прыбытку маюць 2-3 рублі запазычанасці, канстатаваў Андрэй Клец. Выходзіць, альбо не тое вырабляюць, альбо не так прадаюць.

"На большасці прадпрыемстваў дзяржаўнай і камунальнай уласнасці захоўваецца вострая кадравая праблема: катастрафічна не стае кваліфікаваных спецыялістаў у маркетынгу і збыце", - сказаў першы віцэ-губернатар Міхаіл Юхімчук.

У гэтым, як мяркуе чыноўнік, і хаваецца тлумачэнне затаваранасці нашых складоў.

"Відавочна, катаклізмы не толькі ў свеце, яны ў нашых галовах. Іх трэба неадкладна пачысціць", - адкрыта выказаўся губернатар у адрас вертыкалі. І запатрабаваў ад падначаленых кіраўнікоў менш заседжвацца ў кабінетах, а кіраваць працэсам на палях і вытворчых пляцоўках.