Звесткі самапісцаў «Боінга-777» пацвердзілі траплянне ракеты

Неапублікаваныя звесткі «чорных скрыняў» пацвярджаюць, што Боінг збіла ўзарваная ракета.

Пра гэта паведамляе амерыканскі тэлеканал CBS News, паведамляе «Карэспандэнт».

«Яна (ракета) зрабіла тое, для чаго была распрацавана - збіваць самалёты», - цытуе тэлеканал словы еўрапейскага чыноўніка бяспекі палётаў. З ягоных слоў, звесткі самапісцаў пацвярджаюць «дэкампрэсію ў выніку магутнага выбуху».

Нагадаем, бартавыя самапісцы збітага малайзійскага авіялайнера «Боінг-777» 23 ліпеня былі дастаўлены ў Вялікую Брытанію пад наглядам экспэртаў Міжнароднай арганізацыі грамадзянскай авіяцыі ICAO.

17 ліпеня ў Данецкай вобласці пацярпеў катастрофу самалёт «Боінг-777» малайзійскіх авіяліній, які ляцеў з Амстэрдама ў Куала-Лумпур. На борце лайнера знаходзіліся 298 чалавек, у тым ліку 15 чальцоў экіпажа. Да расследавання прычын трагедыі падключыліся міжнародныя спецыялісты.

У сваю чаргу, у Дзярждэпе ЗША ўсклалі на Расею і яе прэзідэнта Уладзіміра Пуціна адказнасць за збіты ў Данецкай вобласці пасажырскі авіялайнер Боінг-777. У ЗША перакананыя, што менавіта сепаратысты збілі пасажырскі самалёт.

У Дзярждэпе ўпэўненыя, што цяжкае ўзбраенне накшталт комплексу «Бук», з якога запусцілі ракету, прадстаўнікі незаконных узброеных фарміраванняў на ўсходзе Украіны не маглі атрымаць без падтрымкі Пуціна.