Расея забараніла ўвоз украінскага соку

Расспажыўнагляд забараніў увозіць сокі, вырабленыя ва Украіне, пры гэтым забарона ўводзіцца і да сокавай прадукцыі для дзіцячага харчавання.

Аб гэтым паведамляецца на сайце ўстановы.

«Федэральная служба нагляду ў сферы абароны правоў спажыўцоў і дабрабыту чалавека паведамляе, што ў мэтах абароны правоў спажыўцоў з 29 ліпеня прыпынены ўвоз на тэрыторыю Расейскай Федэрацыі ўкраінскай сокавай прадукцыі, у тым ліку для дзіцячага харчавання.

Падчасправядзення федэральнага дзяржаўнага санітарна-эпідэміялагічнага нагляду і федэральнага дзяржаўнага нагляду ў галіне абароны правоў спажыўцоў выяўлена, што ўкраінская сокавая прадукцыя не праходзіла дзяржаўную рэгістрацыю на адпаведнасць патрабаванням тэхнічных рэгламентаў Мытнага саюза, пры гэтым на яе этыкетцы паказаны адзіны знак абарачэння прадукцыі на рынку дзяржаў-чальцоў мытнага саюза - «ЕАС».

Адпаведная інфармацыя накіравана ў Федэральную мытную службу і ўправу Расспажыўнагляду аб суб'ектах Расейскай Федэрацыі», - гаворыцца ў паведамленні.

За апошні час гэта ўжо не першая забарона, якая накладаецца расейскімі кантрольнымі органамі на ўвоз прадукцыі з Украіны. З 28 ліпеня ў Расею забаранілі ўвозіць украінскія кансервы з агародніны, садавіны і рыбы.

У той жа дзень расейскія ўлады забаранілі правозіць у ручной паклажы і багажы раслінную прадукцыю з тэрыторыі Украіны.