66% расейцаў выступаюць супраць увядзення войскаў ва Украіну

Дзве траціны расейцаў выказваюцца супраць увядзення расейскіх войскаў ва Украіну.

Пра гэта сведчаць звесткі апытання УЦДГМ.

66% расейцаў выступілі супраць ужывання расейскіх войскаў у неспакойных украінскіх рэгіёнах. Аб патрэбе вайсковага ўмяшання Расеі заяўляе чвэрць (27%) апытаных, і перш за ўсё, масквічы і пецярбуржцы (41%), прыхільнікі КПРФ (35%), рэспандэнты з нізкім даходам (35%).

У той жа час, за апошнія месяцы дзель тых, хто дапускае магчымасць вайны паміж Расеяй і Украінай бліжэйшым часам вырасла: з 17% у канцы сакавіка да 30% у чэрвені.

Адначасова, значна менш стала тых, хто ўважае за неверагодны такі сцэнар: цяпер так думаюць 54% супраць 80% у канцы сакавіка. 11% апытаных заявілі, што такая вайна ўжо ідзе.

Расейцы думаюць, што іх войскі могуць увайсці на ўкраінскую тэрыторыю ў выпадку:

працягу гібелі цывільных жыхароў (18%);

узнікнення пагроз тэрарыстычных актаў на тэрыторыі РФ (18%);

нападу на КПП РФ на мяжы з Украінай (18%);

увядзення войскаў NATO на тэрыторыю Украіны (13%).

3% рэспандэнтаў заявілі, што ўсяго таго, што адбылося, ужо дастаткова для прыняцця такой пастановы.