Беларусь сплаціла першыя $88,3 млн крэдыту ЕўрАзЭС

Менск пачаў планавую выплату стабілізацыйнага крэдыту Антыкрызіснага фонду ЕўрАзЭС.

27 чэрвеня былі выплачаныя першыя $ 88,3 мільёна, паведамляе прэс-служба Міністэрства фінансаў Беларусі. Ва ўстанове не ўдакладнілі, калі адбудзецца чарговая аплата, паколькі графік плацяжоў не публічна не раскрываецца. Ва ўстанове таксама пакуль не валодаюць інфармацыяй пра лёс шостага траншу крэдыту АКФ ЕўрАзЭС на $440 млн, піша БелТА.

Раней амбасадар Расеі ў Беларусі Аляксандр Сурыкаў заявіў, што ў ліпені прадстаўнікі Еўразійскага банка і Беларусі павінны сустрэцца і развязаць лёс таго траншу крэдыту, што застаўся. Расейскае пасольства, са слоў дыпламата, ставіла перад сабой задачу паспрабаваць паскорыць гэтую сустрэчу і знайсці развязанне, каб у гэтым годзе ў верасні-кастрычніку шосты транш быў атрыманы.

Рада Антыкрызіснага фонду ЕўрАзЭС 4 чэрвеня 2011 года ўхваліла вылучэнне Беларусі фінансавага крэдыту ў суме $ 3 млрд. Крэдыт выдзяляецца шасцю траншамі на працягу 2011-2013 гадоў у адпаведнасці з выкананнем этапаў стабілізацыйнага праграмы ўрада Беларусі, нацэленай на стабілізацыю аплатнага балансу і падвышэнне канкурэнтаздольнасці эканомікі. Фінансавыя ўмовы крэдыту адпавядаюць стандартным умовам АКФ для дзяржаў-удзельніц з сярэднім узроўнем даходаў. Крэдыт выдадзены тэрмінам на 10 гадоў, у тым ліку трохгадовы льготны перыяд, і нясе зменлівую адсоткавую стаўку, якая адлюстроўвае кошт фандавання Расеі на міжнародных рынках.

У красавіку мінулага года Беларусь атрымала пяты транш крэдыту АКФ ЕўрАзЭС. З яго улікам ў цэлым краіне было пералічана $2 млрд 560 млн для падтрымання аплатнага балансу і папаўнення міжнародных рэзерваў. У 2013 годзе краіна разлічвала атрымаць таксама шосты транш крэдыту, сума якога складае $440 млн. Аднак у канцы снежня Рада АКФ адклала на паўгода разгляд пытання аб выдачы яго Беларусі.