Паступіць у ВНУ прасцей, чым у ССНУ

У каледжах радуюцца ўдаламу набору: высокі конкурс быў і на бюджэт, і на платнае.

Далёка не ўсе ВНУ змаглі пахваліцца ў гэтым годзе конкурсам, наборам на бюджэт або жадаючымі атрымаць адукацыю за грошы. А вось у ССНУ панаваў ажыятаж! Хутчэй за ўсё, на гэта паўплывалі змены ў правілах паступлення. У прыватнасці, дзевяцікласнікам у гэтым годзе наогул не прыйшлося здаваць уступныя экзамены (у мінулыя гады трэба было напісаць дыктоўку і здаць вусны або пісьмовы экзамен па спецыяльнасці). Прымалі паводле конкурсу сярэдніх балаў атэстатаў, піша «Комсомольская правда в Беларуси».

- ССНУ камунальнай формы ўласнасці ўкамплектаваны на 100%, занятыя ўсе месцы, - радуюцца ў сектары прафесійна-тэхнічнай і сярэдняй спецыяльнай адукацыі Камітэта адукацыі. - І на гэтыя месцы быў конкурс. Напрыклад, у каледжы сферы абслугоўвання - на «Паштовую сувязь» (1,3 чалавека на месца), «Вытворчасць і тэхнічную эксплуатацыю прыбораў і апаратаў» (1,2) і на «Рознічныя паслугі ў банку» (2,2 чалавека на месца ). А яшчэ дзеці, моладзь актыўна паступалі на новую спецыяльнасць «Дашкольная адукацыя» (на базе 9 класаў), там быў конкурс 2 чалавекі на месца.

Педагагічнаму ўніверсітэту імя Максіма Танка, нагадаем, на «Пачатковую адукацыю» прыйшлося праводзіць дадатковы набор. І толькі пасля зніжэння планкі ЦТ там склаўся конкурс - амаль тры чалавекі на месца.

За бюджэтную вучобу ў ССНУ разгарнулася сапраўдная барацьба.

- У гэтым годзе ў нас быў набор на «Камерцыйную дзейнасць», «Правазнаўства» і «Маркетынг», - распавядаюць у Менскім гандлёвым каледжы Белкаапсаюза. - І конкурс быў усюды! Акрамя гэтага, у гэтым годзе мы набралі групы юрыстаў, таваразнаўцаў і маркетолагаў на базе 9 класаў, набралі па 26 чалавек у кожную. Гэта пры тым, што ў мінулым годзе заявы на іх падало па два-тры чалавекі! А цяпер нават конкурс невялікі быў.

У «Вышэйшы дзяржаўны каледж сувязі» таксама прыйшло з лішкам школьнікаў - і пасля 9, і пасля 11 класа. Для дзевяцікласніка ў каледжы было прадугледжана ўсяго 100 бюджэтных месцаў, а заявы прынёс 281 абітурыент! Пецярых ўзялі па-за конкурсам, яшчэ 55, калі не прайшлі на бюджэт, засталіся вучыцца платна. Прычым хлопцы прыйшлі моцныя: у шасцярых атэстат быў у межах 91-100 балаў, у 74 хлопчыкаў і дзяўчынак - ад 81 да 90, яшчэ ў 102 - ад 71 да 80. Слабенькіх амаль не было: толькі пяць чалавек прынеслі атэстаты ад 41 да 50 балаў.

У 11-класнікаў сітуацыя крыху іншая: на 120 месцаў прэтэндавала 197 выпускнікоў. І іх вынікі (атэстат + два сертыфікаты ЦТ) не такія ўражлівыя. Да максімальнай сумы ў 300 балаў наблізіцца змаглі толькі двое з сумай 210-220 балаў. У пераважнай большасці - ад 110 да 150, гэта значыць на кожным тэсце яны набралі ад 20 да 50 балаў (і то пры ўмове нядрэннага атэстата).

А дзе-нідзе конкурс быў нават на платнае!

- Наша самая папулярная спецыяльнасць - «Тэхнічная эксплуатацыя аўтамабіляў», - глядзяць у статыстыку ў аўтамеханічным каледжы. - У мінулым годзе конкурс на яе быў 3,63, у гэтым - 3,4 чалавека на месца. І, вядома, новыя правілы паступлення адбіліся на колькасці выпускнікоў базавай школы: на ўсе спецыяльнасці быў конкурс пад два чалавекі на месца! Мы вельмі задаволеныя, бо ў мінулым годзе дзе-нідзе і да аднаго не дацягвалі. І на платнае таксама конкурс: па паўтара чалавека на месца.

І ў медыцынскім каледжы быў попыт на ўсе спецыяльнасці. Адзін з самых высокіх конкурсаў - 2,6 чалавека на месца - склаўся на «Фармацыю», куды набіралі ўсяго 30 будучых фармацэўтаў. На права стаць фельчарам-акушэрам і памочнікам урача прэтэндавала 156 чалавек пры плане прыёму ў 120. Конкурс на спецыяльнасць «Зубны тэхнік» склаў 1,4 чалавека на месца, а на «Сястрынскую справу» - 1,05 (і гэта пры ўмове, што там быў вялікі набор - 270 чалавек). Калі скончыліся бюджэтныя месцы, абітурыенты сталі ў чаргу на платнае - і ўбачылі, што і тут месцаў хопіць не для ўсіх. На «Сястрынскую справу» быў конкурс у 1,03 чалавека на месца, на «Лячэбную справу» - 1,08, на «Медыка-рэабілітацыйную справу» - 1,1, а на «Фармацыю» - 1,7 (з прахадным балам у 21,3).