Расейскі гранатавы сок вымаюць з крам Віцебска

Днямі абласная інспекцыя Дзяржстандарту выявіла, што ў крамах Віцебска пад выглядам гранатавага соку прадаецца соказмяшчальны напой.

Гаворка ідзе пра двух расейскіх вытворцаў. У адным знайшлі незаяўленыя фарбавальнікі і кансерванты, другі старанна выдае сябе за сок, піша сайт vitbichi.by.

«100% якасці з Азербайджана», «Premium», «Спакон веку гранатавы сок уважаўся за «караля вітамінаў», «100% Pomegranate natural»- такія прываблівыя надпісы можна прачытаць на бутэльках з так званым сокам, які прадаецца ў віцебскіх крамах. Яго вытворцы - таварыства з абмежаванай адказнасцю «Выток» з Масквы (гандлёвая марка «Азербайджанскі фрукт»), «Сіліт» з Маскоўскай вобласці (гандлёвая марка «555»).

- Згодна з патрабаваннямі тэхнічнага рэгламенту Мытнага саюза, якія тычацца сокавай прадукцыі і бяспекі харчовых дабавак, у соках не павінны ўтрымлівацца кансерванты і фарбавальнікі. Яны дапускаюцца толькі ў напоях, - распавяла начальніца Віцебскай абласной інспекцыі Дзяржстандарту Аксана Мурашкевіч. - На этыкетцы сокаў гандлёвай маркі «Азербайджанскі фрукт» паказаны склад: сок вінаградны (гранатавы, шыпшынавы) канцэнтраваны, цукар. Калі мы выпрабавалі прадукцыю ў лабараторыі, то выявілі, што ў вінаградным прысутнічае кансервант (бензойная кіслата і яе солі) і фарбавальнікі - азарубін, тартразін, жоўты «сонечны заход». У гранатавым соку і ў сумесі граната з шыпшынай - бензойная кіслата і яе солі, а таксама фарбавальнік азарубін.

Расейскае прадпрыемства не толькі парушыла патрабаванні тэхнічных рэгламентаў, выкарыстаўшы пры выпрацоўцы сокаў харчовыя дабаўкі, але і не задэкларавала іх у інфармацыі для спажыўца, у той час як фарбавальнікі, якія ўваходзяць у склад, могуць адмоўна ўплываць на актыўнасць і ўвагу дзяцей, як падкрэсліла Аксана Мурашкевіч. Такім вось чынам пакупніка ўводзяць у зман, бо гэта насуперак запаветным літарам на этыкетцы зусім не сок, бо тут маюцца кансерванты і фарбавальнікі. А значыць, вытворца мэтанакіравана сфальсіфікаваў прадукцыю.

Вельмі супярэчлівая інфармацыя размешчаная на бутэльцы з прадукцыяй вытворчасці ТАА «Сіліт». Інспектары Дзяржстандарту цікавіліся ў людзей, што ж гэта такое, на іх погляд, - з апетытным гранатам на этыкетцы, і амаль усе не задумваючыся адказвалі: сок. Сапраўды, там пазначана: «Гранатавы», а крыху ніжэй дробным шрыфтам: «Напой соказмяшчальны мультыфруктовы» (сок гранатавы, яблычны, цытрынавая кіслата, вада, мінімальная доля соку не менш за 10 адсоткаў).

Атрымліваецца, спажыўца зноў спрабавалі абдурыць. Акрамя таго, на цэнніку напою было пазначана: «Гранатавы сок».

Аксана Мурашкевіч адзначыла, што цяперашні рыхтуецца прадпісанне на адкліканне прадукцыі маскоўскага ТАА «Выток» з гандлёвай сеткі рэспублікі. Імпарцёр у сваю чаргу пастановіць, што рабіць з ёй далей: вярнуць вытворцу або ўтылізаваць.