Беларусь недаатрымала на нафтапрадуктах амаль $200 мільёнаў

Амаль на 200 млн даляраў менш зарабіла Беларусь на пастаўках нафтапрадуктаў за першыя сем месяцаў гэтага года.

Як сведчаць звесткі афіцыйнай статыстыкі, у студзені-ліпені пастаўкі на замежныя рынкі нафтапрадуктаў, якія з'яўляюцца галоўным экспартным таварам Беларусі, зменшыліся ў грашовым выражэнні на 192,6 млн даляраў, пішуць «Беларускія навіны».

За першыя сем месяцаў Беларусь паставіла на экспарт 8,61 млн тон нафтапрадуктаў (на 4,3% менш у параўнанні з аналагічным перыядам 2013). У грашовым выражэнні экспарт беларускіх нафтапрадуктаў знізіўся на 2,9% (або на 192,6 млн даляраў) да 6,54 млрд даляраў.

Пры гэтым сярэдняя цана тоны нафтапрадуктаў на экспарт склала ў студзені-ліпені 2014 г. 759,6 даляра, што на 1,5% больш у параўнанні са студзенем-ліпенем 2013 года.

Нагадаем, вывазныя мыты на экспартаваныя нафтапрадукты, вырабленыя з расейскай нафты, Беларусь у сапраўдны час цалкам пералічвае ў расейскі бюджэт.

За першыя сем месяцаў гэтага года Беларусь накіравала ў бюджэт Расеі ў выглядзе вывазных мытаў на нафтапрадукты 2 млрд 39 млн даляраў, у тым ліку ў ліпені – 270,2 млн даляраў. У параўнанні з аналагічным перыядам 2013 аб'ём беларускіх нафтамытаў, пералічаных у расейскі бюджэт, знізіўся на 175,2 млн даляраў, або на 7,9%.

Памяншэнне аб'ёму нафтамытаў, накіраваных у бюджэт Расеі, можа быць абумоўленае змяншэннем экспарту беларускіх нафтапрадуктаў, а таксама павелічэннем на чвэрць экспарту нафтапрадуктаў у Расею. Пры пастаўках паліва на расейскі рынак Беларусі не трэба плаціць экспартную мыту ў бюджэт РФ.

У траўні гэтага года, пасля падпісання Беларуссю дамовы аб Еўразійскім эканамічным саюзе, Масква і Менск дамовіліся, што беларуская старана зможа з 2015 года пакідаць у сваім бюджэце штомесяц нафтамытаў на 125 млн даляраў.

«Штомесяц (з 2015 года) мы будзем пакідаць сабе па 125 млн даляраў такім чынам, каб з нарастаючым вынікам па году атрымалася 1,5 млрд даляраў», - паведаміў журналістам у траўні прадстаўнік Беларусі ў Еўразійскай эканамічнай камісіі, старшыня праўлення Банка развіцця Беларусі Сяргей Румас.

Ён удакладніў, што ў 2015 годзе Беларусь і Расея плануюць зноў вярнуцца да пытання аб размеркаванні вывазных мытаў на нафтапрадукты.

«Стораны ў 2015 годзе вернуцца да гэтага пытання і абмяркуюць магчымасць павелічэння гэтай сумы, гэта запісана ў пратаколе. Калі стораны не дамовяцца, то будзе дзейнічаць цяперашні парадак размеркавання вывазных мытаў на нафтапрадукты», - сказаў Сяргей Румас.