На трасу М4 селі знішчальнікі і штурмавікі

Сёння ВПС і войскамі СПА Беларусі адпрацоўвалася выкарыстанне аўтадарог у якасці запасных аэрадромаў.

На дзялянку трасы М4 селі з наступнай падрыхтоўкай да паўторнага вылету і выхаду на аэрадромы базавання два самалёты-штурмавікі Су-25 і два знішчальнікі МіГ-29, піша БелТА.

Вучэнне прайшло падчас лётна-тактычных заняткаў з авіяцыйнымі звёнамі. Да палётаў прыцягваліся авіятэхніка і экіпажы 116-й гвардзейскай авіяцыйнай базы і 61-й знішчальнай авіябазы ВПС і войскаў СПА. Акрамя таго, у вучэнні былі задзейнічаныя падраздзяленні войскаў сувязі, радыётэхнічных войскаў, а таксама падраздзяленні інжынерна-аэрадромнага, тэхнічнага і тылавога забеспячэння. Авіяцыйнае прыкрыццё раёна праводзілася верталётамі Мі-24 181-й баявой верталётнай базы.

Гэтая дзялянка аўтатрасы М4 была здадзеная ў эксплуатацыю ў мінулым годзе. Намеснік начальніка ўправы - начальнік інжынерна-аэрадромнага аддзела ўправы тылу камандавання ВПС і войскамі СПА палкоўнік Сяргей Кавалевіч адзначыў, што адцінак дарогі быў спраектаваны адмыслова для пасадкі самалётаў. «Каб самалёт здзейсніў пасадку, дзялянка трасы павінна быць прамалінейнай, яе працягласць павінна складаць не менш за 2,1 км, а шырыня пакрыцця - ад 16 м. Пакрыццё і аснова пад ім на гэтай дзялянцы дарогі значна таўсцейшая, чым на стандартнай трасе», - распавёў ён.

У ВПС і войсках СПА Беларусі пытанні выкарыстання дзялякі аўтадарог у якасці запасных аэрадромаў пачалі адпрацоўвацца з 2007 года. Тады 14 красавіка ўпершыню была здзейсненая пасадка на трасу двух Су-25 са складу 206-й штурмавой авіябазы з аэрадрома Ліда, а 4 жніўня пасадку на дарогу ажыццявілі МіГ-29 і Су-27 з 61-й знішчальнай авіябазы з аэрадрома Баранавічы.

Фота: Максім Маліноўскі