Музейны квартал у Менску становіцца даўгабудам

Усе графікі будаўніцтва зрываюцца.

На прыклад Амстэрдама і Вены ў Менску на базе Нацыянальнага мастацкага музея ў 2018 павінен з'явіцца музейны квартал. У адзіны комплекс будуць увязаныя некалькі разрозненых будынкаў на вуліцах Леніна, К. Маркса і Кірава. Выставачныя залы, сувенірныя крамы, кніжныя крамы, шкляныя галерэі, утульныя панадворкі, зімовы сад на даху - гэта будзе горад у горадзе, у якім з карысцю і без нуды менчукі і госці сталіцы змогуць праводзіць ледзь не цэлы дзень, піша агенцтва «Менск-навіны».

Будынак на вуліцы К. Маркса, 24, які ўваходзіць у квартал, ужо абнесены агароджай. Але вежавых кранаў і руху будаўнікоў няма. Чаму?

Кожную пятніцу ў музеі праходзяць нарады з удзелам усіх зацікаўленых асоб. 12 верасня ў працы штаба браў удзел кіраўнік адміністрацыі Ленінскага раёна. Пасля нарады на пытанне нашага карэспандэнта, што з кварталам, Рыгор Шаколін, дырэктар Аб'яднанай дырэкцыі аб'ектаў, якія будуюцца пры Мінкульце, які прадстаўляе заказчыка, адказаў так:

- На аб'екце «Рэстаўрацыя і прыстасаванне адзінага комплексу будынкаў Нацыянальнага мастацкага музея Рэспублікі Беларусь» асвоена блізу 15 млрд рублёў. Цягам двух бліжэйшых тыдняў зробім рывок адразу на двух будынках - Кірава, 25, і К. Маркса, 24, - як толькі атрымаем дазвол Дзяржбуднагляду на правядзенне будаўніча-мантажных работ. У нас былі сур'ёзныя прэтэнзіі да праектных работ. Гаворка аб падрыхтоўцы дакументацыі ААТ «Менскпраект» для праходжання экспертызы, праз што мы страцілі больш за паўтара месяца. Экспертызу праводзяць паўторна.

Журналісты папрасілі генеральнага дырэктара НММ Уладзіміра Пракапцова пракаментаваць сітуацыю. Вось што ён сказаў:

- Пачну з лічбаў. 20 лютага сёлета Дзяржаўная інвестпраграмы вызначыла фінансаванне аб'екта «Рэстаўрацыя і прыстасаванне адзінага комплексу будынкаў Нацыянальнага мастацкага музея Рэспублікі Беларусь» у суме больш за 67,9 млрд рублёў - за кошт сродкаў рэзервовага фонду Прэзідэнта Рэспублікі Беларусь. Музей ініцыяваў штотыднёвыя нарады па пытаннях асваення гэтых сродкаў, шмат гаварылася, шмат пратаколаў складалася, прычым кожны раз тэрміны работ пераносіліся - у асноўным праз непадрыхтаванасць праектнай дакументацыі. Прайшло сем месяцаў. Заказчыкі і праекціроўшчыкі, па сутнасці, не выканалі сваіх прамых абавязкаў. Іх праца звялася да ўзаемных папрокаў і простай перапіскі.

Паводле стану на 15 верасня асваенне сродкаў склала ўсяго 4,4 млрд рублёў - на праектныя работы. Гэта зрыў усіх графікаў. Дазвол на будаўніцтва дагэтуль не атрыманы, у выніку фінансаванне аб'екта зменшанае на 40 млрд рублёў.

Чым гэта пагражае? Горад атрымае даўгабуд.

Не тое што да 2018-га, такімі тэмпамі нават праз 10 гадоў комплекс наўрад ці будзе створаны. Тым часам музейныя работнікі рыхтуюць экспанаты. Гатовая і канцэпцыя экспазіцыі ў будынку на К. Маркса, 24: на другім і трэцім паверхах з'явяцца ўнікальныя творы беларускага дэкаратыўна-прыкладнога мастацтва, прычым частку з іх мы прывязем са свайго філіяла ў Раўбічах. Саламяныя «царскія вароты», арнаты, іконы, слуцкія паясы.

На першым паверсе размесціцца Рэстарацыя - «кубак кавы ў атмасферы мастацтва». Намечана праводзіць прэзентацыі работ мастакоў, выставы-продажы. У будынку на Кірава, 25, прапішуцца бібліятэка, архіў, фондасховішча і рэстаўрацыйная майстэрня. Ідэй вельмі шмат. Галоўнае, каб да канца наступнага года аб'екты на Кірава, 25, і К. Маркса, 24, былі цалкам гатовыя. Тады ў 2016-м возьмемся за будынак на Леніна, 22. Усяго ў нас чатыры чаргі.