Першы афіцыйна ўвезены ў Беларусь электрамабіль прыбыў у Менск

Электрамабілі паволі прыходзяць і на наш рынак.

Кампанія «А-100» для прасоўвання сваёй (як аказалася, не надта рабочай) станцыі зарадкі электрамабіляў прывезла ў Менск Nissan Leaf. Акрамя таго, у Беларусі з'явілася некалькі Tesla Model S. Але першым афіцыйна прадаваным электракарам у нашай краіне, мяркуючы па ўсім, стане Kia Soul EV. Першы асобнік ужо прыбыў да дылера, піша onliner.by.

Як паведамілі прадстаўнікі Kia, сёння ў другой палове дня аўтавоз з Kia Soul прыбыў у Менск. Адзін з гэтых аўтамабіляў мае электрычную сілавую ўстаноўку. Гэты аўтамабіль неўзабаве паставяць на ўлік, і ён будзе даступны для тэст-драйваў. Як паведамілі Onliner.by супрацоўнікі аўтацэнтра, продажы Kia Soul EV пачнуцца толькі ў другой палове наступнага года.

Сусветная прэм'ера першага электрамабіля Kia прайшла ў сакавіку ў аўтасалоне ў Жэневе. Пярэднепрывадны аўтамабіль прыводзіць у рух 109-моцны электраматор, здольны разганяць EV да сотні за 12 секунд. Запас ходу навінкі складае каля 200 км.