Каля Аляскі заўважаныя расейскія знішчальнікі і бамбавікі

За апошні тыдзень расейскія самалёты неаднаразова былі заўважаныя ў рэгіёне ЗША.

Два расейскія рэактыўныя знішчальнікі былі заўважаныя «ў зоне ідэнтыфікацыі паветранай абароны» ЗША каля Аляскі. Пра гэта паведамляе Agence France-Presse са спасылкай на двух высокапастаўленых чыноўнікаў у Пентагоне, піша УНИАН.

Інцыдэнт адбыўся ў сераду, 17 верасня, але вядома пра гэта стала толькі ў пятніцу. Cа слоў чыноўнікаў, на перахоп былі паднятыя знішчальнікі F-22 амерыканскіх ВПС, пасля чаго расейскія самалёты пакінулі зону кантролю амерыканскіх СПА.

Адна з крыніц адзначыла, што гэта першы за доўгі час падобны інцыдэнт з удзелам расейскіх знішчальнікаў.

У той жа час The Washington Free Beacon са спасылкай на прадстаўніка аб'яднанага камандавання аэракасмічнай абароны Паўночнай Амерыкі капітана Джэфа Дэвіса піша, што за апошні тыдзень расейскія самалёты неаднаразова былі заўважаныя ў гэтым рэгіёне.

З ягоных слоў, 17 верасня ВПС ЗША зафіксавалі бамбавікі Тую-95, знішчальнікі МіГ-31 і два запраўшчыка Іл-78. На наступны дзень яшчэ два Тую-95 патрапілі ў поле зроку канадскіх ВПС.

«Група расейскіх самалётаў зрабіла пятлю ў бок поўдня, вяртаючыся на захад у кірунку да Расеі», - удакладніў Дэвіс.

Ён адзначыў, што расейскія самалёты знаходзіліся прыкладна ў 100 кіламетрах ад узбярэжжа Аляскі і ў 73 кіламетрах ад берагавой лініі Канады.

19 верасня паведамлялася яшчэ аб двух падобных інцыдэнтах: ля межаў Вялікабрытаніі, а таксама ля Швецыі. У першым з іх па трывозе з вайсковай базы Лосімаус ў Шатландыі былі ўзняты два знішчальнікі Typhoon Каралеўскіх ВПС Вялікабрытаніі, а ў другім выпадку Стакгольм выказаў пратэст Маскве ў сувязі з парушэннем паветранай прасторы краіны.