Масавае атручэнне жаўнераў у Жодзіна
16- 26.09.2014, 11:54
- 24,839
У 65-й аўтамабільнай брыгадзе ў Жодзіна (в/ч 28729) адбылося масавае атручэнне жаўнераў.
30 вайскоўцаў адчулі сябе дрэнна ў нядзелю 21 верасня, паведаміў чытач «Нашай Нiвы».
«Усё пачалося яшчэ ў нядзелю ўвечары. Мы, як звычайна, схадзілі на вячэру, і праз пару гадзін некаторым з нас стала дрэнна. Усю ноч нашы хлопцы бегалі ў прыбіральню, іх ванітавала. Некаторых даймаў панос. Раніцай у панядзелак у некаторых паднялася тэмпература да 38. 28 чалавек адразу былі адпраўленыя ў санчастку. Яна надалей папаўняецца. Нам забаранілі звальненне і наведваць нас цяпер дазваляюць толькі без ежы», - паведаміў адзін з вайскоўцаў, які праходзіць службу ў гэтай частцы.
Гэтую інфармацыю пацвердзіла сваячка яшчэ аднаго жаўнера тэрміновай службы.
Хлопец распавёў, што палова з тых жаўнераў, якія захварэлі, знаходзіцца на лячэнні ў медсанчастцы. Ён таксама дадаў, што, на ягоную думку, вайскоўцы атруціліся адной з бацькоўскіх перадач, якую елі ўсе разам.
Міністэрства абароны адмаўляе факт хваробы вайскоўцаў.
«Гэтая інфармацыя абсалютна не адпавядае рэчаіснасці», - паведаміў прэс-сакратар міністэрства Уладзімір Макараў.