Шэндэровіч: Расея сама вельмі хутка стане вялікім Прыднястроўем

Асноўная замежнапалітычная задача пуцінскай Расеі - прыніжэнне Украіны і стварэнне на яе тэрыторыі непрызнанай псеўда-дзяржавы.

Аднак, праводзячы такую палітыку, Уладзімір Пуцін рызыкуе зруйнаваць самую Расею. На гэтую тэму разважае вядомы пісьменнік-сатырык, калумніст выдання "Гордан" Віктар Шандаровіч.

З успамінаў відавочцаў, Гітлер любіў паказваць прыступы натхнення: проста падчас нарады мог раптам напісаць што-небудзь на карце для радасці прысутных. Тое, што частка прысутных гэтую імправізацыю загадзя распрацавала, прычым у гэтым жа кабінеце, нікога не бянтэжыла.

Дробная дэталь тактоўна падкрэслівае сваяцтва душ.

Па дарозе ва Улан-Батар Пуцін, паводле ягоных слоў, "накідаў у самалёце" план для ўрэгулявання на Усходзе Украіны...

Наш вялікі мангол сімуляваў натхненне дарэмна. Зразумела і дзіцяці: за тым расейскае войска і ўвайшло ва Украіну, за тое і аддаў свае ногі псеўда-баец "Беркута", дэсантнік Казлоў, каб Пуцін меў цяпер магчымасць прапанаваць замірэнне на сваіх умовах.

Гэта - перамога. Ура! Можна даваць салют. Зняважыць Украіну - гэта ж і была галоўная мэта нашай замежнай палітыкі з часоў Майдана! Які там Ісламскі халіфат пад бокам у Астрахані, які Кітай з войскам большым за ўсё нашае п'янае насельніцтва... Мы і не думаем ў той бок! Прынізіць Кіеў, маці гарадоў расейскіх - вось галоўная радасць расейскага МЗС!

Кіеў, які не збіраўся ваяваць і аддаў ядзерную зброю паводле Будапешцкага пагаднення, з нагоды чаго Штаты і Еўропа ўжо паўгода знаходзяцца ў глыбакадумным замарачэнні...

Ну, добра, перамаглі мы Кіеў - і што мы будзем мець з гэтай перамогі? Перамаглі вялікае Прыднястроўе, турэцкі Кіпр памерам з Бенілюкс, чорную бюджэтную дзірку, за якую мы, і толькі мы з гэтага часу нясем адказнасць. А ніякіх інвестыцый у гэтыя краі не пойдзе, зразумела, ні даляра, толькі распілоўванне бюджэту напрыканцы...

Напрыканцы - таму што самая Расея, што выбівае нагой дзверы ў суседзяў, сама пры такіх звычках вельмі хутка стане вялікім Прыднястроўем...

Усё гэта, зрэшты, кампенсуецца новым узлётам пуцінскага рэйтынгу. Дзеля гэтага і жывем на свеце, уласна кажучы.

Не выключана, што таксама - напрыканцы.