Валянціна Мацвіенка: У Данбасе ўсё больш «добраахвотнікаў» з Расеі

Спікер Савета Федэрацыі Валянціна Мацвіенка заявіла, што на Данбасе расце колькасць байцоў з Расеі.

Пра гэта яна заявіла на цырымоніі развітання з загінулым ва Украіне фотакарэспандэнтам агенцтва «Расея сёння» Андрэем Сценіным, піша NEWSru.com.

«Мы бачым, што ў шэрагі тых людзей, хто мужна змагаецца за свае правы, за справядлівасць, за мір на зямлі нашага братняга народа, усё больш уліваецца добраахвотнікаў з Расеі», - сказала Мацвіенка, кажучы пра расейскіх наймітаў і вайскоўцаў у войсках сепаратыстаў. З яе слоў, «сярод іх таксама ёсць страты».

Раней «Новая газета» высветліла, якім чынам вярбуюць добраахвотнікаў для вайны на Данбасе і колькі складае заробак такіх валанцёраў і іх камандзіраў.

Нагадаем, апошнімі днямі на расейскім дзяржаўным тэлебачанні ўпершыню паказалі сюжэт пра вайскоўцаў РФ, якія загінулі ва Украіне, змагаючыся за сепаратыстаў Данбаса супраць украінскага войска.

Пры гэтым гледачам тэлеканалаў, якія глядзіць большая частка насельніцтва Расеі, патлумачылі, што расейскія жаўнеры спецыяльна бяруць адпачынкі, каб паўдзельнічаць у баявых дзеяннях. Пры гэтым тэлеканалы апяваюць доблесць тых, хто паклаў сваё жыццё, абараняючы ідэі сепаратыстаў, і намякаюць гледачам, што варта ганарыцца ўчынкам гэтых хлопцаў.

Па ўсёй бачнасці, сюжэты дзяржаўных тэлеканалаў паслужылі свайго роду адказам незалежным СМІ, якія ўжо не першы тыдзень паведамляюць аб меркаванай гібелі расейскіх вайскоўцаў, якіх нібыта ўпотай адправілі ва Украіну ваяваць з войскам Кіева.

Раней інфармацыя аб пахаванні расейскіх вайскоўцаў з'явілася ў сродках масавай інфармацыі. Як паведамлялася, хлопцы знаходзіліся на вучэннях на тэрыторыі Расеі. Пры гэтым у сацыяльных сетках юнакі пакідалі запісы, з якіх вынікала, што яны знаходзяцца ў Данбасе.