Помнік князю Ізяславу ўсталявалі ў Заслаўі

Скульптура пакуль схаваная ад гледачоў спецыяльнай накідкай, але як яна выглядае, даведацца можна ўжо цяпер.

Перад устаноўкай на пастамент яго сфатаграфавалі журналісты. Акрамя таго, малюнак будучага помніка ўпрыгожыў святочныя плакаты і банеры на фасадах Заслаўскіх дамоў, піша Салiдарнасць.

Аўтарам помніка з'яўляецца скульптар Аляксандр Прохараў. Сімвалічна, што ён з'яўляецца вучнем скульптара Анатоля Арцімовіча, аўтара помніка Рагнедзе і Ізяславу, які быў створаны ў 1993 годзе і ўсталяваны ў новым мікрараёне Заслаўя. На тым Ізяслаў прадстаўлены маленькім хлопчыкам, які абараняе сваю маці.

Скульптар Прохараў вядомы менчукам і госцям сталіцы скульптурнай кампазіцыяй «Гарадскія шалі», усталяванай у раёне плошчы Свабоды.

На стварэнне новага помніка Ізяславу выдаткавалі 1,2 млрд рублёў. Шырокай публіцы яго прэзентуюць 6 верасня а 19:45.