40 жыхароў Ганконга публічна пагаліліся ў знак пратэсту супраць палітыкі КНР

У Ганконгу 40 чалавек публічна абстрыглі сабе валасы ў знак пратэсту супраць узмацнення ўплыву Пекіна.

Са слоў удзельнікаў акцыі, для кітайца валасы маюць вялікае значэнне, але яны пагадзіліся расстацца з імі і такім чынам паказаць сваю рашучасць ісці на ахвяры дзеля дэмакратыі. Незадаволенасць пратэстоўцаў выклікаў новы закон, паводле якога ўдзельнікі гарадскіх выбараў 2017 павінны быць адобраныя прапекінскім камітэтам, перадае BBC.

Раней паведамлялася, што ўлады Кітая выключылі магчымасць адкрытага вылучэння кандыдатаў на пасаду кіраўніка адміністрацыі Ганконга. З іх слоў, двух-трох кандыдатаў павінен будзе вылучыць камітэт, у якім "шырока прадстаўленыя ўсе пласты насельніцтва" горада. Палітолагі мяркуюць, што ў выніку на выбарах у Ганконгу будуць прадстаўленыя толькі лаяльныя Пекіну кандыдаты, гаворыцца ў публікацыі.

1 ліпеня ў Ганконгу - у гадавіну перадачы гэтай былой брытанскай калоніі пад суверэнітэт Кітая ў 1997 годзе - прайшоў штогадовы шматтысячны марш з патрабаваннем абіраць кіраўніка гарадской адміністрацыі ўсеагульным наўпроставым галасаваннем. Са слоў арганізатараў маршу, у 2014 годзе на яго выйшла рэкордная колькасць удзельнікаў - больш за паўмільёна чалавек. Паліцыя налічыла менш за 100 тысяч дэманстрантаў.

Пасля маршу сотні маніфестантаў зладзілі начную сядзячую акцыю пратэсту ў дзелавым квартале горада. Паліцыя абвясціла гэтую акцыю несанкцыянаванай і арыштавала больш за 500 пратэстоўцаў.

Раней, у чэрвені, грамадзянскія актывісты правялі неафіцыйны рэферэндум у Ганконгу з нагоды таго, як абіраць кіраўніка гарадской адміністрацыі. У плебісцыце ўзялі ўдзел амаль 800 тысяч чалавек, але адміністрацыя Ганконга заявіла, што вынікі галасавання не маюць юрыдычнай сілы, а Пекін назваў рэферэндум "незаконным фарсам".