Літоўскі бізнэсовец прапануе ацяпляць будынкі ў Беларусі лёдам

Новую тэхналогію прэзентаваў надоечы ў Гародні генеральны дырэктар люксембургскай кампаніі UNERA Алегас Рамашкевічус.

Інавацыйная канцэпцыя ацяплення, якая атрымала назву SolarEis, палягае ў тым, што пры арганізацыі ацяплення памяшканняў выкарыстоўваюць спалучэнне пяці аднаўляльных крыніц энэргіі: сонца, паветра, вады, зямлі і лёду. Са слоў дырэктара, у аснове тэхналогіі - спалучэнне сістэм ацяплення і астуджэння, акумуляцыя ўсяго выпрацаванага рознымі крыніцамі цяпла, піша БелТА.

Алегас Рамашкевічус тлумачыць, што згодна з простымі фізічнымі разлікамі пры замярзанні вады вылучаецца столькі ж цяпла, колькі пры яе награванні да 80 градусаў, і гэты момант прапануецца выкарыстоўваць. Разам з сонечнымі калектарамі, якія ўсталёўваюцца на даху будынкаў, усталёўваецца падземнае лёдасховішча. Адзін або некалькі контураў цеплавой помпы апускаюць у яго, тым самым забяспечваючы акумуляцыю цеплавой энэргіі з грунту.

Уся сістэма ўключае ў сябе сонечна-паветраныя абсорберы, цеплавую помпу, лёдасховішча, прылада кіравання і цяпла паветра і зямлі. Акумулятар холаду забірае цяпло з навакольнага асяроддзя, і калі тэмпература ў ім пачынае апускацца ніжэй тэмпературы грунту, акумулятар пачынае назапашваць яе. Сонечная энэргія служыць як дадатковая крыніца цяпла, у выніку чаго падвышаецца эфектыўнасць усёй устаноўкі. Назапашаная цеплавая энэргія можа быць выкарыстаная для сістэмы ацяплення, гарачага водазабеспячэння і астуджэння як памяшканняў, так і тэхнічных і тэхналагічных прылад.

Са слоў бізнэсоўца, тэхналогія дазваляе будаваць экалагічна чыстыя сучасныя будынкі, якія не патрабуюць выкапнёвага паліва. Былі зроблены даследаванні, якія ўсталявалі, што колькасць цеплавой энэргіі, атрыманай ад аднаго лёдасховішча аб'ёмам 10 куб м, параўнальна з цеплынёй, атрыманай пры спальванні 100 л вадкага паліва. Сістэма ўважаецца за высокаэфектыўную, надзейную, экалагічна чыстую. Яна дазваляе знізіць выдаткі на ацяпленне (на 70%) і на астуджэнне (да 99%) будынкаў.

Алегас Рамашкевічус паведаміў, што ў Нямеччыне ўжо ёсць будынкі, пабудаваныя з выкарыстаннем змешаных крыніц энэргіі, канкрэтна гэтай тэхналогіі, распрацоўваюцца праекты для выкарыстання сістэмы SolarEis у муніцыпальных мэтах. "Вядома, ўкараненне інавацыі патрабуе часу, аналізу, але хацелася б, каб такія праекты ў хуткім часе былі рэалізаваныя і ў Беларусі", - сказаў ён. Цяпер Алегас Рамашкевічус вядзе перамовы з адміністрацыяй СЭЗ "Гроднаінвест" аб супрацоўніцтве з заходнімі партнёрамі. Паводле папярэдняй інфармацыі, Bod Group плануе зрэалізаваць у Гародні некалькі праектаў у сферы энэргетыкі. Гаворка ідзе аб стварэнні парку сонечных калектараў ў раёне Гарадзенскага аэрапорта, будаўніцтве завода для вытворчасці сонечных батарэй.