Кіраўнікам прадпрыемстваў далі новыя правы

1 студзеня ўвайшоў у дзеянне дэкрэт №5 «Аб узмацненні патрабаванняў да кіруючых кадраў і работнікаў арганізацый».

Ён быў падпісаны Аляксандрам Лукашэнкам 15 снежня 2014, піша БелаПАН.

На кіраўнікоў арганізацый дзяржаўнай і прыватнай формаў уласнасці ўскладаецца персанальная адказнасць «за забеспячэнне вытворча-тэхналагічнай, выканальніцкай і працоўнай дысцыпліны, належнае ўтрыманне будынкаў, памяшканняў і абсталявання, захаванне ўмоў працы работнікаў. Пры незахаванні патрабаванняў кіраўнік можа быць прыцягнуты да дысцыплінарнай адказнасці аж да звальнення» .

Пры гэтым кіраўнікі прадпрыемстваў надзяляюцца дадатковымі правамі. Прынамсі, яны могуць змяняць умовы працы работніка «ў сувязі з абгрунтаванымі вытворчымі, арганізацыйнымі або эканамічнымі прычынамі», папярэдзіўшы работніка не менш чым за сем каляндарных дзён (раней - у месячны тэрмін).

Кіраўнік таксама мае права дэпрэміяваць работнікаў, якія парушылі дысцыпліну, на тэрмін да дванаццаці месяцаў (раней мерамі дысцыплінарнага спагнання з'яўляліся заўвага, вымова і звальненне).

Кіраўнік арганізацыі можа неадкладна адхіляць работнікаў ад працы «ў выпадку здзяйснення імі дысцыплінарных праступкаў, якія прывялі або здольныя пацягнуць прычыненне арганізацыі шкоды». Перыяд адхiлення ад працы работніку не аплачваецца.

Акрамя таго, кіраўнік можа звольніць работнікаў, якія дапусцілі парушэнне дысцыпліны, якое прычыніла арганізацыі шкоду ў памеры, які перавышае тры сярэднемесячныя па краіне зарплаты.

Кіраўнік арганізацыі таксама можа ўтрымліваць з заробку работніка ў кошт выплаты шкоды, нанесенай па яго віне, да трох сярэднямесячных заробкаў гэтага работніка, без падачы пазову ў суд (раней утрымлівалася шкода ў памеры адной сярэднямесячнай зарплаты).

Кіраўнік мае права ўсталёўваць работніку, які не дапускае парушэнняў дысцыпліны, дадатковыя выплаты стымулюючага характару без абмежавання іх памеру за кошт прыбытку.

У дэкрэце таксама замацаваны пералік дыскрэдытуючых абставінаў звальнення, у адпаведнасці з якімі працоўныя дамовы (кантракты) могуць быць скасаваныя кіраўніком да заканчэння тэрміну іх дзеяння.

За ўтойванне дыскрэдытуючых падстаў звальнення работніка (напрыклад, звальненне «па пагадненні бакоў» работніка, які ўчыніў п'янку на працоўным месцы) кіраўнікі могуць прыцягвацца да дысцыплінарнай адказнасці аж да звальнення.

Дакумент уводзіць забароны і абмежаванні пры прызначэнні на кіруючыя пасады асоб, звольненых па дыскрэдытуючых абставінах. Прынамсі, усталяваная забарона прызначэння на пасады, уключаныя ў кадравыя рэестры кіраўніка дзяржавы, урада, аблвыканкамаў (Менгарвыканкама), раённых, гарадскіх выканкамаў, мясцовых адміністрацый раёнаў у гарадах, асоб, звольненых паводле дыскрэдытуючых абставін, на працягу пяці гадоў з дня такога звальнення.

Прызначэнне такіх асоб (на працягу пяці гадоў пасля звальнення паводле дыскрэдытуючых абставін) на іншыя кіруючыя пасады ў арганізацыі дзяржаўнай і прыватнай формаў уласнасці павінна праводзіцца са згоды раённага, гарадскога выканкама, мясцовай адміністрацыі. Такое ўзгадненне праводзіцца на падставе інфармацыі пра кандыдата, у тым ліку прадстаўлення матываванага хадайніцтвы арганізацыі і прыкладаемых да яго характарыстык з папярэдніх месцаў працы за апошнія пяць гадоў.

Гэты дэкрэт «скіраваны на выкараненне безгаспадарчасці, умацаванне вытворча-тэхналагічнай, працоўнай і выканальніцкай дысцыпліны, а таксама спыненне фактаў працаўладкавання нядобрасумленных кіраўнікоў на новую кіруючую пасаду», адзначалася ў афіцыйным каментары прэс-службы дыктатара.

Але дэкрэт неадназначна ўспрынялі незалежныя экспэрты, на думку якіх ён істотна пагаршае прававое становішча работнікаў і кіраўнікоў арганізацый.

У прыватнасці, як заявіў у каментары БелаПАН кіраўнік Асацыяцыі малога і сярэдняга прадпрымальніцтва юрыст Сяргей Балыкін, дакумент супярэчыць Канстытуцыі, Працоўнаму кодэксу і міжнародным абавязацельствам, прынятым Беларуссю ў рамках Міжнароднай арганізацыі працы.

Паводле слоў Балыкіна, дакумент устанаўлівае "нейкую феадальную сістэму адносін". "Кіраўнік арганізацыі (дзяржаўнай або прыватнай) з гэтага часу з'яўляецца па сутнасці сваёй васалам вышэйстаячага начальніка, які мае права цалкам вызначаць яго далейшую працоўную біяграфію. Сам жа кіраваць ў дачыненні да з падначаленымі яму работнікамі фактычна атрымлівае правы феадала, які мае магчымасць аднаасобна чыніць суд i распараджацца людзьмі як сваёй уласнасцю ", - заявіў кіраўнік АМІСП.