Мясцовым «дэпутатам» забаранілі карыстацца Картай паляка

Услед за дзяржслужачымі і «дэпутатамі» нелегітымнага беларускага «парламента».

Гэта вынікае са змяненняў у Закон «Аб статусе дэпутата мясцовага Савета дэпутатаў», апублікаваных 9 студзеня на Нацыянальным прававым інтэрнэт-партале.

Артыкул 5 змененага закона цяпер будзе дапоўнены наступнымі палажэннямі: «Дэпутат Савета не мае права атрымліваць ад замежных дзяржаў дакументы, якія прадстаўляюць права на льготы і перавагі ў сувязі з палітычнымі, рэлігійнымі поглядамі або нацыянальнай прыналежнасцю, а таксама карыстацца такімі ільготамі і перавагамі, калі іншае не вынікае з міжнародных дагавораў Рэспублікі Беларусь. Дэпутат Савета, які мае дакументы, названыя ў частцы чацвёртай гэтага артыкула, абавязаны перадаць іх на час ажыццяўлення сваіх паўнамоцтваў у адпаведны мясцовы выканаўчы i распарадчы орган».

Дзеянні беларускіх уладаў, накіраваныя на абмежаванне дзеяння Карты паляка, пачаліся ў 2011 годзе. Тады Канстытуцыйны суд выказаў меркаванне аб тым, што польскі закон аб Карце паляка супярэчыць міжнароднаму праву, а менавіта - агульнапрызнаным прынцыпам суверэннай роўнасці і неўмяшання ва ўнутраныя справы дзяржаў, палажэнням Венскай канвенцыі аб консульскіх зносінах і Консульскай канвенцыі паміж Рэспублікай Беларусь і Рэспублікай Польшча; палажэнням пагаднення паміж урадамі Беларусі і Польшчы аб узаемных паездках грамадзян, заключанага шляхам абмену нотамі 20 снежні 2007 года.

Шэраг юрыстаў і польскія дыпламаты палічылі пастановы КС беспрэцэдэнтнымі, паколькі суды адной дзяржавы, па агульнаму правілу, не выказваюцца ў адносінах да законаў іншага.

Карта паляка з'яўляецца дакументам, які пацвярджае прыналежнасць грамадзяніна краін СНД і Балтыі да польскага народа. Атрымаць яе можа асоба, якая валодае польскай мовай на базавым узроўні, мае ў сваяцтве паляка або таго, хто меў польскае грамадзянства (бацька, маці, бабуля, дзядуля, прабабуля, прадзед). Карта сапраўдная цягам 10 гадоў з дня выдачы і пры наяўнасці адпаведнай заявы падаўжаецца на наступныя 10 гадоў.

Уладальнік карты мае права: атрымаць доўгатэрміновую шматразовую візу на знаходжанне ў Польшчы; легальна працаваць на тэрыторыі Польшчы без атрымання дазволу на працу; займацца прадпрымальніцкай дзейнасцю нароўні з польскімі грамадзянамі; у першачарговым парадку прэтэндаваць на фінансавыя сродкі, якія выдзяляюцца для падтрымкі палякаў за мяжой з дзяржаўнага або мясцовага бюджэту (на ўзроўні гміны); праязджаць па чыгунцы з 37% зніжкай.