Макарэвіч пра марш у Парыжы: Такая акцыя паказвае ўсяму свету, народ перад ім ці насельніцтва

Акцыя салідарнасці ў Парыжы, якая сабрала амаль два мільёны чалавек, стала вельмі незвычайнай для свядомасці сярэдняга расейца падзеяй.

Пра гэта ў сваім блогу на "Снобе" напісаў музыка Андрэй Макарэвіч.

"Гэта самая сапраўдная Дэманстрацыя Народнага Адзінства - бо кожны выйшаў паказаць сваю салідарнасць з суграмадзянамі, якіх забілі гэтыя іншапланецяне. І выхадам сваім казаў - мы не баімся. Нас больш. Такая акцыя паказвае ўсяму свету - народ перад ім ці насельніцтва", - адзначыў музыка.

Макарэвіч таксама падкрэсліў, што ў Расеі былі тэракты са значна большай колькасцю ахвяр, аднак ніколі не было такога яднання людзей, як на маршы ў Парыжы.

Удзельнікамі Марша адзінства, які адбыўся 11 студзеня ў Парыжы, сталі каля 1,5 млн чалавек. Аналагічныя акцыі ў рэгіёнах Францыі сабралі яшчэ больш за мільён удзельнікаў. Паводле звестак Le Parisien, агульная колькасць удзельнікаў нядзельных акцый, прысвечаных нядаўнім тэрактам, склала каля 3,3 млн чалавек.

У выніку тэрактаў 7-9 студзеня загінула 17 чалавек, у тым ліку 10 супрацоўнікаў газеты "Chalie Hebdo". Для ўдзелу ў Маршы адзінства ў Францыю прыбылі кіраўнікі краін ЕЗ.