Мянчук, які наехаў на школьніка, атрымаў тры гады «хіміі»

Прысуд у справе аб смяротным наездзе на 10-гадовага школьніка на бульвары Шаўчэнкі ў Менску вясной мінулага года абвешчаны 16 студзеня ў судзе Цэнтральнага раёна.

43-гадовы кіроўца прыгавораны да трох гадоў пазбаўлення волі ў папраўчай калоніі ва ўмовах пасялення. Кіраваць транспартнымі сродкамі яму забаронена на працягу пяці гадоў, пішуць «Беларускія навіны».

Суд абавязаў абвінавачанага выплаціць кампенсацыю маральнай шкоды пацярпелым: бацьку дзіцяці - 100 млн рублёў, маці - 200 млн рублёў, дзядулі - 50 млн рублёў.

Нагадаем, 26 сакавіка 2014 каля 14:00 на пешаходным пераходзе на бульвары Шаўчэнкі аўтамашынай Volvo XC90 быў смяротна траўмаваны хлопчык. У дачыненні да кіроўцы распачалі крымінальную справу.

Следства звяртала ўвагу на тое, што гэты нерэгулюемы пешаходны пераход пазначаны гарызантальнай дарожнай разметкай зебра і дарожнымі знакамі «Пешаходны пераход», што ў адпаведнасці з ПДР патрабуе ад кіроўцы падвышанай увагі і прыняцця мер да зніжэння хуткасці, аж да прыпынку транспартнага сродку, для гарантавання бяспечных умоў руху пешаходаў.

Падчас расследавання былі праведзеныя тры следчыя эксперыменты і шэраг судовых экспэртыз, апытаныя відавочцы. Высветлена, што пазадарожнік рухаўся з хуткасцю не менш за 55 км/г пры дазволенай на гэтым участку дарогі хуткасці не больш за 40 км/г.

Былі атрыманыя звесткі, якія пацвярджаюць, што кіроўца праявіў злачынную нядбайнасць, неабачлівасць і няўважлівасць да дарожнай абстаноўкі і яе зменаў, выбраў хуткасць, якая не гарантуе яму кантроль за бяспечным рухам транспартнага сродку. Ён таксама не ўлічыў наяўнасць двух аўтамабіляў, якія стаялі перад пешаходным пераходам і абмяжоўвалі агляд дарогі справа, уключаючы ўчастак пешаходнага пераходу, і не ўпэўніўся ў адсутнасці перад імі пешаходаў, якія ўступаюць або якія ўступілі на зебру.

Следства паказвала, што парушэнне кіроўцам шэрагу пунктаў ПДР складаецца ў прамой прычынна-следчай сувязі з падзеяй дарожна-транспартнага здарэння і ягоных наступстваў - смерцю дзіцяці.

Дзеі, учыненыя абвінавачаным, следчымі былі кваліфікаваныя як злачынства, прадугледжанае ч.2 арт.317 КК.

Падчас расследавання абвінавачваны сваю віну не прызнаў. Пры гэтым следства звярнула ўвагу на тое, што за апошнія некалькі гадоў ён больш за 25 разоў прыцягваўся да адміністрацыйнай адказнасці за парушэнне ПДР, з іх больш за 10 разоў - за невыкананне хуткаснага рэжыму. За паўгадзіны да здзяйснення наезду аўтаматычнай камерай відэаназірання на праспекце Пушкіна было зафіксавана чарговае перавышэнне ім хуткаснага рэжыму на 21 км/г.

Сваю віну абвінавачаны не прызнаў і ў судзе. Ён сцвярджаў, што не перавышаў хуткасць, ехаў 40 км/г, а на пешаходным пераходзе і паблізу яго нікога не было.

Падчас спрэчак 13 студзеня дзяржабвінаваўца папрасіў прысудзіць падсуднага да пяці гадоў пазбаўлення волі з адбываннем пакарання ў калоніі-пасяленні. Абарона акцэнтавала ўвагу суда на тое, што дзіця перабягала праезную частку па-за пешаходным пераходам. Пра тое, што хлопчык быў збіты за пераходам, у судзе казалі і экспэрты. У апошнім слове абвінавачаны ў чарговы раз папрасіў прабачэння ў бацькоў загінулага.

Бацькі загінулага школьніка заяўлялі ў судзе пазовы аб матэрыяльнай кампенсацыі маральнай шкоды. У карысць бацькі хлопчыка - 300 млн рублёў (100 млн ужо былі перададзеныя абвінавачаным), маці - 300 млн, дзядулі - 100 млн рублёў.