МЗС Вялікай Брытаніі: Скасаванне санкцый супраць Расеі несвоечасовае

Вялікая Брытанія ўважае магчымае паслабленне санкцый супраць Расеі за несвоечасовае.

Пра гэта заявіў кіраўнік МЗС гэтай краіны Філіп Хэманд, паведамляе РІА «Новости».

З ягоных слоў, краіны Еўразвяза выставілі ўмовы, на падставе якіх можна будзе разрадзіць сітуацыю з Расеяй. Гаворка ідзе аб выкананні Масквой абавязацельстваў у рамках менскіх пагадненняў. «Мы ўсе хацелі б гэта ўбачыць, мы ўсе хацелі б мець магчымасць аслабіць санкцыі, але як толькі Расея будзе выконваць свае абавязацельствы», - заявіў ён перад пачаткам пасяджэння рады ЕЗ у замежных справах.

Супраць паслаблення санкцыйнага рэжыму выказаўся і міністр замежных спраў і гандлю Ірландыі Чарльз Флэнагэн (Charles Flanagan). «Мы зноў заклікаем Расею забяспечыць выкананне менскіх [дамоўленасцей] і асудзілі акты агрэсіі, якія працягваюцца. Але любыя заявы пра тое, што ЕЗ рухаецца да паслаблення санкцый, былі б няправільнымі», - сказаў ён.

Нагадаем, 16 студзеня прэзідэнт ЗША Барак Абама дамовіўся з прэм'ер-міністрам Вялікай Брытаніі Дэвідам Кэмеранам пакінуць уведзеныя санкцыі супраць Расеі ў дзеянні.

У той жа дзень еўракамісар у еўрапейскай палітыцы суседства і перамоваў у пашырэнні Ёханэс Хан заявіў, што Еўразвяз гатовы разгледзець пытанне аб зняцці антырасейскіх санкцый, аднак на такі крок у Брусэлі могуць пайсці толькі ў выпадку рэалізацыі менскіх дамоўленасцей. Пры гэтым ён падкрэсліў, што ЕЗ трымае свае дзверы адкрытымі і выступае супраць абмежавальных мер.

Менскае пагадненне было падпісана 5 верасня 2014 года ў сталіцы Беларусі. З боку Расеі свой подпіс паставіў паўнамоцны амбасадар Расеі ва Украіне Міхаіл Зурабаў, з боку Украіны - экс-прэзідэнт Леанід Кучма, які меў мандат ад кіраўніцтва краіны. З боку АБСЕ дакумент падпісаў швейцарскі дыпламат Хайдзі Тальявіні. Рэжым спынення агню ўвайшоў у дзеянне ў гэты ж дзень з 18:00 паводле мясцовага часу. Тым не менш да гэтага часу неаднаразова з'яўляліся паведамленні аб аднаўленні баявых дзеянняў на ўсходзе Украіны.