Імпартныя тавары знікаюць з паліц крам

Беларусам раяць забыцца пра хурму, мандарыны і ласось.

Уладальнік харчовых крамаў, сустаршыня Рэспубліканскай канфедэрацыі прадпрымальніцтва Віктар Маргелаў - пра тое, калі на паліцах з'явяцца хурма, мандарыны, памідоры, ласось і іншыя імпартныя прадукты.

Фота са старонкі ў «Фэйсбуку» Андрэя Кабанава

Многія беларусы заўважылі знікненне з прылаўкаў крам садавіны, гародніны, рыбы і круп.

- Гэта вынік прынятай Мінгандлю пастановы аб замарожванні цэн, - тлумачыць Віктар Маргелаў. - Імпарцёры ў першай палове студзеня не завозілі нічога, бо панеслі б вельмі жорсткія страты.

15 студзеня Мінгандлю і Мінэканомікі апублікавалі правілы-парады ў фармаванні коштаў, у адпаведнасці з якімі кошты на імпарт размарозілі і прывязалі да даляра, піша «Салiдарнасць».

«Карона» заваленая карыснай белакачаннай». Фота з Instagram Івана Бондарава

Паводле рэкамендацый, на імпартныя тавары, набытыя пасля 18 снежня, дапускаецца павелічэнне адпускной цаны не больш чым на працэнт змены курсу беларускага рубля да курсу валюты дамовы на дату пастаноўкі на ўлік, паменшанага на 5%. Ці дапаможа гэтая мера вярнуць у крамы імпартныя прадукты?

- З аднаго боку, гэтыя правілы вельмі недакладныя, і як фармаваць кошт з улікам рэнтабельнасці продажаў, толкам ніхто не ведае, - кажа Віктар Маргелаў. - Імпарцёры падзяліліся. Адны мяркуюць, што можна рызыкаваць, іншыя кажуць: «Лепш мы пакуль пачакаем». На сённяшні дзень можна казаць аб частковым аднаўленні рынку.

Асабліва ў цяжкай сітуацыі выявіліся тыя, хто прадае свой тавар доўга. Схема, прапанаваная Мінгандлю і Мінэканомікі, не ўлічвае, які курс даляра будзе праз тры месяцы, праз паўгода, калі гандлёвыя прадпрыемствы прададуць тавар і вымушаныя будуць купляць валюту, каб аддаць сваім пастаўшчыкам. І відавочна, што калі па схеме Мінгандлю сфармаваць цану, бізнэс панясе відавочныя страты. Таму для пэўнай катэгорыі застаецца закрытым пытанне імпарту тавараў у Беларусь.

Для рознічнай сеткі дазволілі, не павышаючы нацэнку, браць тавар ад пастаўшчыкоў. Праўда, незразумела, як праверыць, яны правільна сфармавалі кошт ці не.

Сітуацыя неадназначная і казаць аб тым, што ўсё пройдзена, нельга, але нейкае паслабленне ёсць.

Са слоў Віктара Маргелава, ён супрацоўнічае з пяццю імпарцёрамі. Двое з іх пакуль не працуюць.

Суразмоўца прагназуе, што бліжэйшым часам перабоі з імпартнымі таварамі паменшацца, але і кошты на іх паднімуцца. Пры гэтым да таго часу, пакуль беларускі рубель не намацае дно, і не адпусцяць цэны, у гандлі дэфіцыт імпартных прадуктаў стане звычайнай з'явай.

- Прэм'ер-міністр сказаў, што адпусцяць кошты, але ён не сказаў - калі. Таму што ніхто не ведае, дзе дно ў беларускага рубля, - сказаў на заканчэнне суразмоўца.