Лаўроў разлічвае дамагчыся падзелу Украіны з дапамогай Францыі і Нямеччыны

Кіраўнік МЗС заявіў, што будзе пераконваць еўрапейскіх калег прымусіць Кіеў да канстытуцыйнай рэформы.

Сяргей Лаўроў забыўся пра свае снежаньскія словы і зноў мудрагеліста патрабуе федэралізацыі Украіны. Кіраўнік МЗС Расеі заявіў, што падчас сустрэч у «нармандскім фармаце» будзе абмяркоўвацца як спыненне агню на лініях размежавання, так і прапановы Расеі аб «федэралізацыі» або «аўтанамізацыі» Украіны, піша ZN.ua.

На сваёй прэс-канферэнцыі Лаўроў заявіў, што прычынай крызісу ва Украіне з'яўляецца не расейскі агрэсія, доказаў якой, з ягоных слоў, ён дагэтуль не атрымліваў, а розніца ў поглядах «нацыяналістычнага» Захаду і выдуманага Расеяй «Паўднёва-Усходу». Пад «Паўднёвым-Усходам» у Расеі разумеюць шэраг абласцей паўднёвай і ўсходняй Украіны нават насуперак таму, што самаабвешчаныя рэспублікі - гэта толькі трэць тэрыторый дзвюх абласцей - Данецкай і Луганскай.

Паводле ягоных слоў, «сістэмная задача» для Расеі - правядзенне канстытуцыйнай рэформы ва Украіне, перадае ТАСС.

«Гэта таксама будзе абмяркоўвацца ў Бэрліне - патрэба прыняць ў Кіеве палітычную пастанову, каб падтрымаць такі падыход», - заявіў Лаўроў, дадаўшы, што канстытуцыйная рэформа затрымліваецца ўкраінскімі ўладамі.

«Нават згадкі слоў «федэралізацыі», «аўтанамізацыі», «дэцэнтралізацыя» ўжо становяцца з пункту гледжання кіеўскіх уладаў непрыстойнымі», - паскардзіўся Лаўроў, забыўшыся, што рэформа дэцэнтралізацыі ва Украіне стартавала, і з боку кіеўскіх улад згадваецца рэгулярна.

Больш за тое, Лаўроў выказаў неразуменне, чаму Украіна наогул павінна быць унітарнай дзяржавай, нягледзячы на інтарэсы «расейцаў» у ёй.

«А Украіна павінна быць чамусьці ўнітарнай дзяржавай, незалежна ад таго, якія там інтарэсы ў расейцаў, у вугорцаў, румынаў ды іншых нацыянальнасцяў, якія засяляюць Украіну», - абурыўся Лаўроў.

Згодна з бачаннем Лаўрова, патрабаваная Расеяй рэформа можа памірыць «нацыяналістычна настроены захад, цэнтр і Паўднёвы Усход, у якіх героі розныя».

Хоць кіраўнік МЗС Расеі стаў больш асцярожны з тэрмінамі і больш не патрабуе публічна федэратыўнага ладу Украіны, пра што Лаўроў ды іншыя першыя асобы РФ неаднаразова згадвалі ў сакавіку 2014 года, пад канстытуцыйнай рэформай фактычна разумеецца раскол унітарнай формы дзяржаўнага ладу з перадачай значных, у тым ліку і блакавальных для замежнапалітычных пастаноў краіны, паўнамоцтваў усходнім абласцям Украіны.

Толькі ў снежні 2014 Лаўроў адмаўляўся ад сваіх слоў і заяўляў, што Расея не прапануе федэралізацыі Украіны.