Беларусаў у бліжэйшы час чакаюць «арэлі» надвор’я

У бліжэйшы час чакаецца нестабільнае надвор'е.

Пра гэта паведаміў журналістам на анлайн-брыфінгу ў сераду начальнік службы гідраметэаралагічных прагнозаў Рэспубліканскага гідраметэаралагічнага цэнтра Дзмітрый Рабаў.

У чацвер, 22 студзеня, умовы надвор'я на тэрыторыі Беларусі будуць вызначаць атмасферныя франты, якія прынясуць на большую частку тэрыторыі ападкі: снег, мокры снег, а па паўднёвым захадзе - з дажджом. Месцамі туман, галалёд, на асобных участках дарог галалёдзіца. Тэмпература ноччу ад -5 градусаў па паўночным усходзе да 1 градуса па паўднёвым захадзе, днём -2...3 градуса.

У пятніцу і суботу, 23 і 24 студзеня, часам будуць праходзіць ападкі ў выглядзе мокрага снегу і дажджу. Месцамі туман, галалёд, на дарогах галалёдзіца. Тэмпература ноччу -4... +2 градуса, днём -3...4 градуса.

У нядзелю, 25 студзеня, зноў крыху падмарозіць: тэмпература цягам дня -6...1 градус, ноччу пры праясненнях -7...-12 градусаў. На большай частцы тэрыторыі кароткачасовы снег, мокры снег. Месцамі туман, слабы галалёд, на дарогах галалёдзіца.