На аўкцыёне ўпершыню прадалі рэкламныя месцы ў метро
10- 21.01.2015, 20:01
- 8,520
У Менску 20 студзеня адбыўся першы аўкцыён продажу рэкламных месцаў на сценах у пераходах станцый метро.
Начальнік упраўлення гандлю і паслуг Менгарвыканкама Ніна Емяльянава распавяла БелаПАН, што было прададзена 18 месцаў для рэкламы ў пераходзе станцыі «Малінаўка».
«Раней такія аўкцыёны не праводзіліся, і на першым аўкцыёне было выручана 270 млн. рублёў. Цэны падняліся ў 50-60 раз ад першапачатковай - менш за 1 млн. Самы дарагі лот - 69 млн. рублёў», - сказала Емяльянава.
Паводле яе слоў, «інтарэс у прадпрымальнікаў ёсць». «Мы арганізавалі аўкцыён таму, што, калі звярнуліся прадпрымальнікі і юрыдычныя асобы за арэндай такіх месцаў, быў вельмі вялікі попыт - да 10 на адно месца. Таму і было прынятае рашэнне Менгарвыканкама аб правядзенні аўкцыёну. Выстаўлялася 23 месцы, прададзена 18. Праз месяц мы правядзем яшчэ адзін аўкцыён. Думаем яшчэ больш зарабіць грошай у бюджэт Менска», - адзначыла начальнік упраўлення.