NASA будзе выкарыстоўваць акуляры дапоўненай рэальнасці Microsoft

Для даследавання Марса NASA будзе выкарыстоўваць акуляры дапоўненай рэальнасці HoloLens.

Даследчыкі з лабараторыі NASA Jet Propulsion Laboratory аб'ядналі намаганні з Microsoft для стварэння праграмы OnSight, якая будзе працаваць з акулярамі дапоўненай рэальнасці HoloLens, паведамляе «Інтерфакс» са спасылкай на Mashable.

Адной з навінак, прэзентаваных Microsoft на прэзентацыі напярэдадні, сталі акуляры дапоўненай рэальнасці HoloLens, якія прыцягнулі найбольшую ўвагу журналістаў і грамадскасці. Акуляры дазваляюць ствараць 3D-аб'екты, якія ўбудоўваюцца ў навакольны свет і выглядаюць падобна на рэальныя дзякуючы прынцыпу галаграфіі.

З дапамогай HoloLens даследчыкі змогуць вывучаць аднаўленую на аснове атрыманых раней марсаходам Curiosity звестак паверхню Марса, не пакідаючы сваіх офісаў. Праграмнае забеспячэнне OnSight дазволіць, у сваю чаргу, кіраваць прыладамі марсахода з дапамогай жэстаў.

Лабараторыя JPL плануе пачаць тэставаць OnSight летам.