Канаплёў назваў трэнераў-замежнікаў «ворагамі народа»

Старшыня Беларускай федэрацыі гандбола крытычна адгукнуўся аб замежных трэнерах, якія працавалі з беларускімі клубамі.

Уладзімір Канаплёў заявіў, што яны не давалі развівацца беларускім гульцам, піша "Прессбол".

- Калі Мяшкоў сабраў касцяк зборнай у БГК пасля развалу «Дынама», я быў рады. Я не вельмі засмучаўся, што «Дынама» не стала: за нашыя грошы там уздымалі ўзровень замежных гульцоў. Скажу шчыра: замежныя трэнеры, якія працавалі з нашымі клубамі, - ворагі народа. Хіба што Бябешка, які размаўляў з намі на адной мове, быў выняткам.

БГК - гэта ўжо не беларускі клуб. І беларусы, якія ў ім гуляюць, ужо згубленыя: Шумак, Баранаў, Шыловіч ... Лепей хай яны гуляюць у «Машэку», у «Кронане», калі не цягнуць сусветны ўзровень. Так, Дзяніс Рутэнка прабіўся. А хто яшчэ прабіўся? Шыловіч як быў аднатыпным гульцом, так і застаўся. Я ў свае 60 гадоў бачу, куды ён будзе кідаць, - заявіў ён.

Уладзімір Канаплёў з'яўляецца сябрам дзяцінства беларускага правадыра. Ён быў памочнікам Лукашэнкі яшчэ ў той час, калі будучы дыктатар з'яўляўся дэпутатам Вярхоўнага Савета краіны. У 1995 ён быў абраны дэпутатам парламента. Уладзімір Канаплёў узначальваў праўладную дэпутацкую фракцыю «Згода» і з'яўляўся членам прэзідыума Вярхоўнага Савета. Пасля рэферэндуму 1996 года і разгону легітымнага парламента ён стаў намеснікам старшыні «палаты прадстаўнікоў».

У кастрычніку 2000 года ён зноў стаў «дэпутатам» ад Шклоўскай выбарчай акругі №75. На першай пазачарговай сесіі новай «палаты прадстаўнікоў» яго абралі намеснікам старшыні. З 2004 да 2007 гады ён узначальваў лукашэнкаўскі «парламент».

Цяпер Уладзімір Канаплёў з'яўляецца прэзідэнтам Федэрацыі гандбола Беларусі.