Рада кіраўнікоў МЗС краін ЕЗ экстрана разгледзіць сітуацыю ва Украіне

Латвія патрабуе пазачарговага пасяджэння Рады міністраў замежных спраў.

Пра гэта гаворыцца ў паведамленні МЗС краіны, пішуць "Украинские новости".

"Становіцца ўсё больш відавочным, што напад прамаскоўскіх тэрарыстычных груповак на Марыупаль і іншыя месцы на ўсходзе Украіны, бесчалавечныя і цынічныя дзеянні супраць грамадзянскага насельніцтва, цалкам пацвярджаюць той факт, што Расея не зацікаўленая ў мірным урэгуляванні канфлікту", - гаворыцца ў паведамленні.

Адзначаецца таксама, што прапанаваныя Расеяй "мірныя ініцыятывы" і ўдзел у шматбаковых перамовах, імаверна, служылі толькі маскай і імітацыяй дзейнасці. У ведамстве падкрэсліваюць, што арганізатары агрэсіі павінны ўсведамляць, што міжнародная супольнасць рашуча і жорстка адрэагуе на далейшае абвастрэнне канфлікту.

Чакаецца, што гэтыя падзеі будуць абмяркоўвацца Радай бяспекі ААН. У сувязі з гэтым Латвія заклікае тэрмінова склікаць пазачарговае пасяджэнне Рады міністраў ЕЗ замежных спраў.

Раней прэзідэнт Еўрапейскага парламента Марцін Шульц і генеральны сакратар Рады Еўропы Турб'ерн Ягланд асудзілі артабстрэл Марыупаля Данецкай вобласці і заклікаюць Расею вярнуцца за стол перамоваў.