Аляксандр Ермаковіч: У абароне БАТЭ паўстала істотная брэш
1- 25.01.2015, 11:39
- 6,303
Галоўны трэнер БАТЭ распавёў пра задачы, пастаўленыя перад камандай на зборах у Турцыі.
Гутарку з Аляксандрам Ермаковіч апублікаваў афіцыйны сайт клуба.
- Трэнерскі штаб парадаваў стан футбалістаў. Магу сказаць, што і летась яны добра папрацавалі перад выхадам з адпачынку. Цяпер жа атрымалася яшчэ лепш. Хлопцы прафесійна паставіліся да падрыхтаваных для іх iндывiдуальных планаў, - сказаў ён.
- У Белек з Менска вылецелі 22 гульцы.
- Яшчэ павінны дадацца Жэня Яблонскі і Улад Клімовіч, якія выступаюць за беларускую "маладзёжку" на "Кубку Садружнасці" ў Санкт-Пецярбургу. У дадатак на прагляд прыехаў латвійскі цэнтральны абаронца Каспар Дуброў. Не выключана, што на гэтым зборы да нас далучыцца яшчэ адзін футбаліст гэтага амплуа. Усё ж пасля сыходу Ягора Філіпенкі ў абароне паўстала істотная брэш.
- БАТЭ пакінулі лідэры калектыву - Ягор Філіпенка і Анры Хагуш. Напэўна мяркуеце, што іх месца павінны заняць Стасевіч і Жаўнерчык?
- Натуральна, узрост, досвед і статус дазваляюць Ігару і Максіму стаць важакамі. Звязваем з імі вялікія надзеі. Разлічваем, што Стасевіч і Жаўнерчык будуць лідэрамі на полі і ў распранальні.
- Умовы надвор'я ў Турцыі ў студзені непрадказальныя...
- Футбольныя палі тых гатэляў, дзе мы жывем у Белеку, заўсёды рыхтуюць самым дбайным чынам. Ну а мы будзем верыць, што дажджы не перашкодзяць працы, што нашы планы не зведаюць карэкціровак з прычын непагадзі.