The Sunday Times: Магчымы лаўрэат «Оскара» кідае Крэмль у халодны пот

Пасёлак Церыберка на ўзбярэжжы Баранцава мора выявіўся ў цэнтры адной з самых гарачых сварак, якія ўзніклі ў расейскай культуры.

Аб гэтым піша карэспандэнт The Sunday Times Марк Франкеці, паведамляе Инопресса.ру. У Церыберцы быў зняты расейскі фільм «Левіяфан», якому ў лютым прадказваюць «Оскар». «Фільм раскалоў краіну і глыбока абурыў Крэмль - не ў апошнюю чаргу таму, што часткова фінансаваўся дзяржавай», - адзначае аўтар.

Са слоў Франкеці, жыццё расейскай правінцыі намаляванае ў фільме змрочным і бязлітасным. Журналіст пабываў у Церыберцы. «Большая частка пасёлка - струхлелыя будынкі і пахіленыя драўляныя дамы, даўно кінутыя жыхарамі, якія шукаюць лепшай будучыні», - сведчыць ён. Бліжэйшая лякарня - у 85 мілях.

«Чыноўнікі ўзлаваныя тым, як намаляваная Церыберка. Кіраўніца мясцовай адміністрацыі Таццяна Трубіліна заклікала забараніць фільм», - гаворыцца ў артыкуле.

Большасць жыхароў ведае пра канфлікт вакол фільма, распавядае Франкеці, але кіно пакуль не глядзелі. «Я не ведаю людзей, якія б так пілі і брыдкасловілі, як персанажы фільма; гэта вельмі гіпербалізаваны партрэт, - сказала 28-гадовая Алена, жонка марака з расейскага атамнага флоту. - Тут жывецца выдатна і бяспечна: ні коркаў, ні злачынстваў, прырода прыгожая. улагоджвае душу».

Іншага меркавання Валерый, якога карэспандэнт сустрэў па дарозе на працу на электрастанцыю: «Гэта рэалістычны фільм. Карумпаваны мясцовы мэр цісне на простых людзей, а яны нічога не могуць зрабіць: гэта здараецца кожны дзень ва ўсёй краіне. Што ў гэтым асаблівага?»

Са свайго боку, міністр культуры РФ Мядзінскі сказаў, што «Левіяфан» са звышкан'юнктурнасцю гоніцца за міжнародным поспехам, і заявіў, што ў будучыні такія стужкі не атрымаюць дзяржаўнай падтрымкі.

Франкеці заўважае: «З часоў царызму расейскія ўлады праяўлялі выключную крыўдлівасць, сустракаючыся з крытычнымі апісаннямі, асабліва праўдзівымі».

«Мы не любім, калі нас ставяць перад непрыхаванай праўдай», - сказала Людміла Гаўрылава, жыхарка Церыберкі. «Мы любім прыкідвацца, што ўсё выдатна. Гэта абсурд. Вядома, ёсць нястрымныя злоўжыванні ўладай, ёсць хабар і алкагалізм. Але Пуцін у гэтым не вінаваты. Я хацела б абняць яго і падзякаваць за ўсё, што ён робіць для Расеі», - дадала яна.