Жарко: Медыкі павінны працаваць не за грошы

Медыкам, якія чакаюць падвышэння заробку, міністр аховы здароўя нагадаў аб клятве Гіпакрата.

На калегіі Міністэрства аховы здароўя, якая 30 студзеня сабрала ўсіх кіраўнікоў галіны, міністр Васіль Жарко распавёў, што ў гэты няпросты крызісны год кожны медык разумее, што даваў клятву Гіпакрата. "І працуе не за грошы. А паводле сумлення і свайго паклікання".

Грашовы чыннік вельмі важны, і чым большы ў чалавека дастатак, вядома, тым лепш. Але міністр падкрэсліў, што міністэрскія работнікі - гэта не тыя людзі, якія не разумеюць, у якім стане цяпер эканоміка, піша tut.by.

Васіль Жарко нагадаў, што ў мінулым годзе заробкі медыкам падвышалі двойчы. Першы раз - для амбулаторна-паліклінічнага звяна, другі - для ўсёй сістэмы аховы здароўя. У 2015 годзе падвышаць заробкі будуць толькі за кошт эканоміі і аптымізацыі бюджэтных сродкаў.

"Частку мы будзем накіроўваць на стымуляванне (работы медыкаў), а частку - на ўмацаванне матэрыяльна-тэхнічнай базы", - растлумачыў чыноўнік.

Таксама міністр расказаў, што ў 2014 годзе ўдалося зэканоміць 255 млрд рублёў, якія пайшлі на заробкі медыкам.

Нагадаем, у мінулым годзе былы намеснік прэм'ер-міністра Анатоль Тозік заявіў, што галоўная праблема аховы здароўя Беларусі - праблема заработнай платы медперсаналу. Развязваць яе трэба на працягу двух гадоў, "інакш ёсць пагроза дэградацыі галіны", казаў Васіль Жарко на выніковай калегіі Міністэрства аховы здароўя ў пачатку 2014 года. І паабяцаў, што ў 2014 годзе на 40% павялічыцца заробак участковых лекараў і медперсаналу хуткай меддапамогі. Але заробак работнікаў хуткай дапамогі ў красавіку вырас усяго на 320-450 тысяч рублёў.

Акрамя таго, на пасадзе намесніка прэм'ер-міністра Анатоль Тозік неаднаразова выказваўся пра тое, што чалавек павінен плаціць за бясплатную меддапамогу. Менавіта Анатоль Тозік яшчэ ў пачатку 2012 года прапанаваў увесці плату за наведванне паліклінік.