За графіці на помніках архітэктуры Магілёва затрыманыя падлеткі

Міліцыя затрымала непаўналетніх, якія наносілі надпісы на старадаўнія дамы па вуліцы Лазарэнкі ў Магілёве.

Пра гэта паведаміў 30 студзеня журналістам начальнік УУС Магілёўскага аблвыканкама Аляксандр Кавальчук, піша БелаПАН.

Раней 24 мясцовыя жыхары звярнуліся ў Магілёўскі гарвыканкам і да міліцыі з просьбай прадухіліць пастаяннае апаганьванне гістарычных будынкаў па вуліцы Лазарэнкі і пакараць вінаватых у рэгулярным нанясенні на іх надпісаў. Подпісы былі сабраныя ў асноўным сярод прыхаджан пратэстанцкай царквы «Віфанія», размешчанай па вул. Лазарэнкі, 5.

«Супрацоўнікамі дэпартамента аховы Ленінскага раёна былі затрыманыя непаўналетнія, якія наносілі графіці на гэтым фасадзе, яны выяўленыя, але прыцягнуць іх да адміністрацыйнай адказнасці не ўдалося з прычыны таго, што яны не дасягнулі ўстаноўленага законам узросту. Да адказнасці былі прыцягнутыя іх бацькі паводле артыкула 9.4 за невыкананне абавязкаў у выхаванні дзяцей. Гэтыя матэрыялы разгледжаныя на адміністрацыйнай камісіі. І ніякага матыву, акрамя як дзіцячая свавольства, там не праглядаецца», - заявіў Кавальчук.

Разам з тым ён адзначыў, што міліцыя не можа кожны аб'ект ахоўваць кругласутачна на бязвыплатнай аснове. У той жа час маецца магчымасць для рэлігійнай арганізацыі што да платнай аховы будынка. «Ёсць іншыя спосабы, якія таксама агаворваліся з імі, - устаноўка відэаназірання, сваёй вартавой аховы. Пытанне знаходзіцца ў гэтай плашчыні», - адзначыў начальнік абласной міліцыі.

Адзначым, што, паводле сцвярджэння падпісантаў звароту, несанкцыянаванае нанясенне абразлівых надпісаў на будынках, унесеных у спіс культурна-гістарычнай спадчыны, па вуліцы Лазарэнкі пачалося пасля таго, як у 2008 годзе актывісты БРСМ правялі акцыю ў размалёўванні сцяны пуцеправода праз раку Дубровенка.