Кошты будуць расці паводле новых правіл

Мінгандлю і Мінэканомікі аслабляе цэнавы дыктат і ўводзіць новыя рэкамендацыі для суб'ектаў гаспадарання ў фармаванні коштаў.

Правілы фармавання коштаў распаўсюджваюцца на юрыдычных асоб і індывідуальных прадпрымальнікаў, якія вядуць прадпрымальніцкую дзейнасць у вытворчасці або продажы тавару на тэрыторыі Беларусі, у тым ліку рэзідэнтаў СЭЗ, юрыдычных асоб і прадпрымальнікаў, уключаных у Дзяржрэестр гаспадарчых суб'ектаў, якія займаюць дамінуючае становішча на таварных рынках. Правілы не распаўсюджваюцца на фармаванне тарыфаў на паслугі юрыдычных асоб і індывідуальных прадпрымальнікаў, уключаных у Дзяржрэестр гаспадарчых суб'ектаў, якія займаюць дамінуючае становішча на таварных рынках і якія ўклалі дамовы з антыманапольным органам, піша 5min.by.

Фармаванне коштаў лекаў, а таксама вырабаў медыцынскага прызначэння, медыцынскай тэхнікі будзе праводзіцца ў рамках указа прэзідэнта №366 ад 11 жніўня 2005 года «Аб фармаванні коштаў лекавых сродкаў, вырабаў медыцынскага прызначэння і медыцынскай тэхнікі».

Падвышэнне коштаў і тарыфаў тавараў ці паслуг будзе праводзіцца толькі на велічыню змены кошту. На імпартныя тавары, якія паступілі ў Беларусь пасля 18 снежня 2014, павелічэнне адпускнога кошту дапускаецца толькі на велічыню змены курсу беларускага рубля ў дачыненні да валюты дамовы ў параўнанні з 18 снежнем 2014 года. Рэнтабельнасць продажаў пры гэтым не можа перавышаць 3% агулам па арганізацыі.

Пры фармаванні коштаў індывідуальнымі прадпрымальнікамі і юрыдычнымі асобамі дапускаецца выкарыстанне гандлёвых надбавак, якiя не перавышаюць узровень паводле стану на 18 снежня 2014 года. Рэнтабельнасць продажаў паводле канчатковага фінансавага выніку пры гэтым не павінна перавышаць 3%.

Рэалізацыя плодаагародніннай прадукцыі са стабілізацыйных фондаў будзе праводзіцца адпускнымі коштамі, усталяванымі пастановай аблвыканкама і Менскага гарвыканкама паводле стану на снежань 2014 года.

Вытворцам паслуг пры фармаванні тарыфаў лістом рэкамендавана кіравацца аналагічнымі падыходамі, як і для вытворцаў тавараў.