Гурт Camerata прэзентаваў новую калядную песню
6- 7.01.2015, 16:01
- 7,455
Унікальны беларускі калектыў прадставіў кампазіцыю «На Раство» ў абноўленым складзе.
Гурт Camerata пакінулі Таццяна Дробышава і Ігар Мельнікаў. Новым чальцом каманды стаў Філіп Смялоў.
Спецыяльна для tuzin.fm cітуацыю пракаментавала асноўная аўтарка калектыву, кампазітар і вакалістка Вольга Вараб'ёва.
«Ігар і Таццяна сышлі за больш высокімі заробкамі. Мы ўзялі наўзамен толькі барытон. Гэта Філіп Смялоў. Ён выпускнік музычнага ліцэя, як і ўсе, хто цяпер у Camerata. Да таго ж у яго дзве вышэйшыя адукацыі - харавога дырыгента і гукарэжысёра», - сказала яна.
У сваю чаргу Ігар Мельнікаў растлумачыў, што яму папросту надакучыў ранейшы выгляд дзейнасці, і ён цяпер заняўся педагогікай.
«З 1 верасня я працую ў аркестры Фінберга. Займаюся з усім вакальным цэхам - тузінам вакалістаў. Акрамя таго, для падтрымкі формы мы з Таццянай Дробышавай стварылі вакальны квартэцік з больш лёгкай і жыццесцвярджальнай музыкай, з традыцыйным джазам. Назвы ён пакуль не мае. У нас толькі адна рэпетыцыя была разам з інструменталістамі. Вярстаем праграму. А Camerata я жадаю поспехаў. Хай працуюць і выступаюць далей. Калі ім гэта цікава, я толькі за», - сказаў ён.
Найбліжэйшы канцэрт абноўленага гурту адбудзецца 15 студзеня ў Вялікай зале філармоніі сумесна з маскоўскім калектывам Cristal Chorus. Са слоў Вольгі Вараб'ёвай, як і раней, вызначаюцца канцэрты ў Беларусі і за мяжой, адначасова ідзе праца над новымі кампазіцыямі.
Адной з іх стала калядка «На Раство», якую гурт сёння рады прадставіць.