Паўночная Карэя хоча набыць расейскія знішчальнікі

Улады КНДР цікавіліся расейскімі знішчальнікамі Су-35.

Пра гэта паведамляе паўднёвакарэйская прэса са спасылкай на крыніцы ў вайсковых колах Паўднёвай Карэі. Цяпер КНДР валодае толькі састарэлымі савецкімі і кітайскімі знішчальнікамі, піша РБК.

Пра тое, што Паўночная Карэя зрабіла спробу набыць у Расеі яе перадавыя знішчальнікі, даслаўшы для гэтай мэты ў Маскву спецыяльнага пасланніка, піша Korea Joongang Daily са спасылкай на высокапастаўленую крыніцу ў паўднёвакарэйскім вайсковым ведамстве.

«Цой Рэн Хэ, які наведаў Маскву ў якасці спецыяльнага пасланніка паўночнакарэйскага лідэра Кім Чэн Ына ў лістападзе мінулага года, папрасіў прэзідэнта Расеі Уладзіміра Пуціна паставіць знішчальнікі Су-35», - сцвярджае крыніца выдання.

Прэс-служба Крамля не стала распаўсюджваць падрабязнасці візіту паўночнакарэйскага пасланца, толькі удакладніўшы, што ён перадаў ліст Кім Чэн Ына. Сустрэча, якая прайшла 18 лістапада, была закрытая для прэсы, дэталі праходжання перамоў таксама не паведамляліся.

Як адзначыла крыніца, КНДР вырабляе многія сістэмы ўзбраенняў унутры краіны, аднак, імаверна, яна звярнулася за дапамогай да Расеі, паколькі стварэнне знішчальнікаў патрабуе больш складаных тэхналогій.

Тым не менш паўднёвакарэйская крыніца мяркуе, што Расея не гатовая з лёгкасцю прадаць свае знішчальнікі праз міжнародныя санкцыі супраць Паўночнай Карэі. Пакуль застаецца невядомай колькасць знішчальнікаў, якую хацеў бы набыць Пхеньян.

Падчас расейскага візіту Цой Рэн Хэ яго дэлегацыя наведала Хабараўск, дзе знаходзіцца асноўны завод па вытворчасці знішчальнікаў Су.

У 2011 годзе нябожчык бацька і папярэднік цяперашняга паўночнакарэйскага лідэра Кім Чэн Ір ужо спрабаваў пры наведванні Расеі набыць у яе новыя знішчальнікі, у 2010 годзе Пекін адхіліў яго просьбу аб набыцці вайсковых самалётаў.