ДАІ ў Менску пачынае эвакуяваць аўто па начах

«Наватарам» у правядзенні начных рэйдаў стаў аддзел ДАІ Маскоўскага раёна сталіцы.

У гэтай частцы горада праблема з колькасцю парковачных месцаў абвостраная як нідзе, піша «БелТА»

«Мы толькі эвакуюем з тратуара або зялёнай зоны аўтамабіль, як тут жа на яго месцы з'яўляецца іншы. І кіроўцы нават не бянтэжацца супрацоўнікаў ДАІ. Мінулай ноччу мы эвакуявалі блізу дзесяці аўтамабіляў», - распавядае інспектар ДПС АДАІ Маскоўскага РУУС Максім Чаранкоў і разам з кіроўцам эвакуатара Віктарам Чукмасавым прыступае да працы.

Шукаць парушальнікаў доўга не прыходзіцца. Сімпатычны Volvo S40, няўдала прыпаркаваны на скрыжаванні праспекта Газеты «Звязда» з вуліцай Бялецкага, так і просіцца ў ціскі эвакуатара. Пакуль мы працуем з іншамаркай, Віктар Чукмасаў развенчвае міфы.

«Некаторыя кіроўцы мяркуюць, што калі шчыльненька прыпаркавацца да бардзюра, вось як гэты, - паказвае на Volvo, - эвакуатаршчык не зможа падступіцца да аўтамабіля і пакіне яго ў спакоі. Але гэта не так!». Віктар чапляе аўто за колы з боку праезнай часткі і злёгку адсоўвае аўтамабіль ад бардзюра.

У гэты час Максім Чаранкоў «афармляе» парушальніка, не забываючы пстрыкнуць на тэлефон факт парушэння і аформіць журналістаў у якасці сведак. А я дастаю калькулятар. Шляхам няхітрых маніпуляцый вылічваецца штраф - мінімум Br670 тысяч. Як абвяшчае арт.18.22 КаАП Беларусі за парушэнне правілаў прыпынку і стаянкі транспартнага сродку накладаецца штраф сумай адной базавай адзінкі - Br180 тысяч. Цяпер да гэтай сумы трэба дадаць кошт паслуг эвакуатара (Br430 тысяч) і штрафстаянкі (суткі/Br60 тысяч).

Гэтая лічба яшчэ можа змяніцца ў большы бок, калі выявіцца, што кіроўца ўжо парушаў гэтыя правілы або забярэ сваё аўто не раніцай, а, скажам, праз тыдзень. І ў якасці бонуса - супрацоўнікі ДАІ могуць не выявіць ва ўладальніка аўтамабіля пасведчання аб своечасова пройдзеным тэхаглядзе. Толькі аўтамабіль узнімаецца ўверх, у яго спрацоўвае сігналізацыя.

Кіроўца эвакуатара лёгка грузіць аўтамабіль, інспектар ДПС спакойна дапісвае дакумент і не відаць абуранага ўласніка, які імчыць да нас насустрач - брыво задрыжала толькі ў мяне. Скажу больш - ніхто нават не выглянуў у акно, і мы спакойна павезлі так упадабаны мной Volvo на штрафстаянку.

Стаянка ў раёне вуліцы Напалеона Орды разлічаная на грузавыя аўтамабілі і аўтобусы, некалькі шэрагаў на ёй «падарылі» ДАІ, і ўсе яны практычна цалкам занятыя. Ідэальна «паркуем» наш першы трафей і зноў адпраўляемся ў дарогу.

Наш наступны кліент - нямецкі ўніверсал маркі Mercedes-Benz. Таксама прыпаркаваны паблізу пешаходнага пераходу, ён адпраўляецца на эвакуатар. А Віктар Чукмасаў прадаўжае кансультаваць нас: «Ці вось яшчэ многія стырно выкручваюць - даўно ўжо не дапамагае. За чатыры колы падчапіў – выкручанае стырно ці не - і пагрузіў».

Але, нарэшце, кіроўца эвакуатара прызнаецца, што з некаторымі габарытнымі аўто ёсць праблемы. «Ёсць машыны досыць цяжкія, і іх падняць цяжка. Напрыклад, той жа Nissan Navara або Toyota Land Cruiser. Калі парушэнне здзейсненае грузавым аўтамабілем, на яго колы вешаюць блакатар», - тлумачыць ён.

Інспектар ДПС Максім Чаранкоў прызнаецца, што і ў двары ягонага дома складана знайсці месца для стаянкі, але недалёка ёсць платная паркоўка. «Паезджу хвілін 20 па двары, хто-небудзь выедзе - і я на яго месца. А ўзімку ўсё-ткі аддаю перавагу ставіць аўто на платную паркоўку. Развязаць гэтую праблему ў Менску складана, але хочацца хаця б не дапусціць трагічных здарэнняў», - кажа афіцэр.

За мінулы перыяд 2015 у Менску за парушэнне правілаў паркоўкі і стаянкі было эвакуявана амаль 15 тысяч аўтамабіляў.