S&P прагназуе двухразовы рост праблемных крэдытаў беларускіх банкаў

Міжнароднае рэйтынгавае агенцтва Standard&Poor's чакае пагаршэнне якасці банкавых актываў у Беларусі.

Сёлета дзель праблемных крэдытаў у банкавай сістэме Беларусі можа дасягнуць 10%, гаворыцца ў аглядзе, які падрыхтавалі аналітыкі рэйтынгавага агенцтва, піша udf.by са спасылкай на БелаПАН.

На думку Standard&Poor's, беларуская эканоміка, у значнай ступені залежная ад вонкавых чыннікаў, і сёлетняе паслабленне беларускага рубля "абумовіць пагаршэнне характарыстык фандавання банкавай сістэмы".

"Дэпазіты кліентаў шмат у чым залежаць ад чынніку даверу з боку ўкладчыкаў і ваганняў валютнага курсу, у выніку чаго паказчыкі ліквіднасці банкавай сістэмы застаюцца нестабільнымі, а адкрытыя валютныя пазіцыі банкаў - зменлівымі", - мяркуюць аналітыкі рэйтынгавага агенцтва.

Уплыў дэвальвацыі на якасць актываў таксама можа быць істотным, уважаюць прадстаўнікі Standard&Poor's.

"Мы прагназуем рост сумы праблемных крэдытаў з 4,6% агульнага крэдытнага партфеля ў канцы 2014 года прыкладна да 8-10% у канцы 2015", - гаворыцца ў аглядзе Standard&Poor's.

Карпарацыйны сэктар у Беларусі, мяркуюць аналітыкі агенцтва, у значнай ступені залежыць ад дынамікі развіцця расейскай эканомікі, "якая цяпер знаходзіцца ў стадыі рэцэсіі і ў варунках стрэсавай сітуацыі".

"Акрамя таго, дэвальвацыя нацыянальнай валюты стварае інфляцыйны ціск у Беларусі, што негатыўна адбіваецца на платаздольнасці хатніх гаспадарак", - прагназуюць аналітыкі рэйтынгавага агенцтва.

У той жа час, дапускаюць яны, вонкавы і ўнутраны шок можа быць часткова нейтралізаваны падтрымкай з боку дзяржавы.

"Гэтыя негатыўныя чыннікі могуць быць часткова нейтралізаваныя добрай аплатнай дысцыплінай беларускіх пазычальнікаў, а таксама маштабнай дзяржаўнай падтрымкай, якая наўпрост і ўскосна даецца беларускаму банкаваму сэктару", - гаворыцца ў аглядзе Standard&Poor's.