«Мэр» Берасця апраўдваецца за адключэнне асвятлення
18- 22.11.2015, 10:49
- 32,748
Аляксандр Рагачук пракаментаваў прынятую раней уладамі абласнога цэнтра пастанову аб адключэнні вулічнага асвятлення ў начны час.
Пра гэта паведамляе сайт brestcity.com.
«Такія захады прадыктаваныя эканамічнымі прычынамі і накіраваныя на эканомію бюджэтных сродкаў, каб горад у поўнай меры мог забяспечваць іншыя свае выдаткі, перш за ўсё ў сацыяльнай сферы», - заявіў Аляксандр Рагачук.
У той жа час, паводле ягоных слоў, пошук магчымасцяў у аптымізацыі расходаў бюджэтных сродкаў будзе працягнуты. Старшыня гарвыканкама выказаў меркаванне, што «напэўна, не зусім правільна, калі гарадскія вуліцы ў вячэрні час і глыбокай ноччу, калі жыццё практычна замірае, асвятляюцца ў аднолькавым рэжыме». «Тым жа часам Берасце не павінна ўначы апускацца ў поўную цемру», - падкрэсліў ён.
Нагадаем, з сярэдзіны лістапада ў Берасці пачалі адключаць вулічнае асвятленне на некалькі гадзін - глыбокай ноччу - «у мэтах аптымізацыі расходавання энэргетычных рэсурсаў і эканоміі бюджэтных сродкаў». У ноч з пятніцы на суботу і з суботы на нядзелю асвятленне ажыццяўляецца ў звычайным рэжыме.