МЗС РФ рэкамендуе расейцам не ездзіць на адпачынак у Турцыю
70- 24.11.2015, 21:29
- 160,604
У Растурызме прыслухаліся да меркавання МЗС, які рэкамендаваў расейцам устрымацца ад паездак у Турцыю пасля катастрофы Су-24.
Федэральнае агенцтва турызму пачынае працу для выканання рэкамендацыі МЗС, кіраўнік якога Сяргей Лаўроў параіў сёння расейцам не ездзіць на адпачынак у Турцыю, піша РБК.
«Рэкамендацыю МЗС РФ мы атрымалі. Растурызм пачынае працу для выканання гэтых рэкамендацый», - заявіў кіраўнік Растурызму Алег Сафонаў (цытата з ТАСС). Ён растлумачыў, што ўжо сёння ягоная ўстанова накіруе запыты найбуйнейшым тураператарам, якія працуюць з Турцыяй.
«Мы ўжо сёння будзем настойліва рэкамендаваць спыніць рэалізацыю турпакетаў у Турцыю як наўпрост, так і праз трэція краіны», - паведаміў Сафонаў (цытата з РІА «Новости»). «Нашы турысты не павінны туды адпраўляцца, калі там ёсць пагроза бяспекі. Цяпер не сезон, і я спадзяюся, што іх там няшмат», - дадаў кіраўнік Растурызму.
Такім чынам, Турцыя можа стаць другой пасля Егіпта краінай, у якую будзе прыпынены продаж турыстычных тураў з Расеі.
Нагадаем, 24 лістапада турэцкія вайскоўцы збілі расейскі знішчальнік, які парушыў паветраную прастору краіны.
Таксама турэцкія вайскоўцы апублікавалі заяву, згодна з якой перад тым, як расейскі самалёт Су-24 быў збіты, яго 10 разоў папярэджвалі аб парушэнні паветранай прасторы.
Сірыйскія паўстанцы сцвярджаюць, што катапультаваныя пілоты Су-24 былі застрэленыя ў паветры, калі спускаліся з парашутамі. З іх слоў, абодва пілоты былі знойдзеныя ўжо мёртвымі.