БДУ: Практыка платных пераздач адпавядае заканадаўству

Адміністрацыя Белдзяржуніверсітэта ўважае практыку пабораў са студэнтаў за законную.

Аб гэтым паведамляецца на афіцыйным сайце Белдзяржуніверсітэта, паведамляе БелТА.

Палажэнне аб платных пераздача акадэмічных запазычанасцяў у БДУ было зацверджанае 12 лістапада. «Гэтым скарысталіся некаторыя асобы і арганізацыі, якія не маюць дачынення да БДУ, каб справакаваць незадаволенасць у студэнцкім асяроддзі. У сувязі з гэтым уважаем за мэтазгоднае дадаткова патлумачыць прававыя аспекты прынятай пастановы», - сказалі ў ВНУ.

Пастановай Міністэрства адукацыі Беларусі №99 ад 21 ліпеня 2011 года зацверджаны тыпавыя формы дамоваў аб падрыхтоўцы спецыялістаў з вышэйшай адукацыяй за кошт сродкаў рэспубліканскага бюджэту, а таксама на платнай аснове.

«Цяпер навучанне ўсіх студэнтаў, як на платнай аснове, так і за кошт сродкаў рэспубліканскага бюджэту, вядзецца на падставе ўкладзеных дамоваў. Кожны студэнт, які жадае атрымаць якасную адукацыю, абавязаны выконваць умовы дамовы, у тым ліку добрасумленна і адказна ставіцца да засваення зместу адукацыйных праграм, праграм выхавання», - сказалі ў БДУ.

У дамовах аб падрыхтоўцы спецыялістаў за кошт сродкаў рэспубліканскага бюджэту і на платнай аснове запісана, што «ліквідацыя акадэмічнай запазычанасці, паўторнае праходжанне існай і выніковай атэстацыі навучэнцаў вядуцца за дадатковую аплату ў адпаведнасці з заканадаўствам Рэспублікі Беларусь».

Студэнты прымаюць гэтыя ўмовы, калі падпісваюць дамовы. Адпаведна, і выкананне гэтых умоў павінна быць абавязковым. Парадак ліквідацыі акадэмічнай запазычанасці вызначаны пунктамі 15, 37, 38, 39, 40, 77 Правілаў правядзення атэстацыі студэнтаў, курсантаў, слухачоў пры засваенні зместу адукацыйных праграм вышэйшай адукацыі, зацверджаных пастановай Міністэрства адукацыі Беларусі №53 ад 29 траўня 2012 года.

Нагадаем, што рознагалоссі паміж студэнтамі і адміністрацыяй БДУ пачаліся пасля таго, як у ВНУ агучылі планы ўвесці аплату за пераздачу залікаў і экзаменаў. Універсітэцкую моладзь абурыла такая перспектыва. Студэнты сабралі супраць новаўвядзення больш за 2500 подпісаў, а ў сеціве «Вконтакте» з’явілася група «# студентыпротив». Яе ўдзельнікі паведамілі пра намер заявіць на ВНУ ў пракуратуру, калі аплата за пераздачы будзе ўведзеная.

Нягледзячы на пратэсты, 12 лістапада рэктар БДУ падпісаў палажэнне аб платных пераздачах.

У адказ актывісты руху «# студентыпротив» запланавалі 2 снежня правесці ў Менску марш студэнтаў. Чакаецца, што да яго далучацца ад 300 да 500 чалавек. 26 лістапада на старонцы мерапрыемства «ВКонтакте» з'явілася завочнае запрашэнне рэктару.