Турэцкая падлодка сустрэла вайсковы карабель Расеі пры праходжанні Дарданэл

Турэцкая падводная лодка сустрэла транспарт ВМФ Расеі «Яўза» падчас праходжання праліва Дарданэл.

Пра гэта паведамляе Lenta.ru са спасылкай на турэцкі партал Haberler.com.

Сайт апублікаваў відэа і фота, зробленыя, як сцвярджаецца, раніцай 30 лістапада ў раёне горада Чэнакале, на якіх відаць, як субмарына ў надводным становішчы ідзе насустрач транспарту, што накіроўваецца ў Мармуровае мора і, верагодна, затым у Сірыю.

30 лістапада ўкраінскі Цэнтр транспартных стратэгій, прааналізаваўшы графік руху расейскіх суднаў у Басфоры, паведаміў, што з 29 лістапада ў іх паўсталі праблемы з праходжаннем праліва. Паводле звестак сістэмы онлайн-адсочвання перамяшчэння суднаў, у гэты дзень расейскія судны перамяшчаліся зігзагамі і коламі, доўга чакаючы дазволу зайсці ў Басфор, у той час як судны астатніх краін праходзілі без затрымак.

28 лістапада прэс-сакратар прэзідэнта Расеі Дзмітрый Пяскоў назваў апакаліптычным сцэнаром магчымасць перакрыцця Турцыяй Чарнаморскага праліву для расейскіх суднаў. У той жа час ён адзначыў, што ступень прадказальнасці дзеянняў турэцкага кіраўніцтва вызначаецца з цяжкасцю.

Стасункі паміж Масквой і Анкарой пагоршыліся пасля таго, як франтавы бамбардзіроўшчык Су-24 са складу расейскай авіягрупы ў Сірыі 24 лістапада быў збіты турэцкімі знішчальнікамі F-16. Самалёт упаў на поўначы Сірыі каля мяжы з Турцыяй, камандзір экіпажа загінуў, штурман быў выратаваны. Акрамя таго, у выніку абстрэлу сірыйскімі баевікамі гелікоптэра, які выляцеў на пошукі экіпажа бамбардзіроўшчыка, загінуў адзін марскі пяхотнік.

28 лістапада прэзідэнт Расеі падпісаў указ аб увядзенні санкцый у дачыненні да Турцыі.

Пасля інцыдэнту з Су-24 прэс-сакратар расейскага прэзідэнта заявіў, што расейская авіяцыя, якая дзейнічае ў Сірыі, будзе выконваць заданні пад прыкрыццём расейскіх СПА.

Міністр абароны таксама заяўляў, што Расея перакіне на сірыйскую авіябазу найноўшы зенітна-ракетны комплекс С-400, здольны паражаць любыя лятальныя апараты, а таксама крылатыя і балістычныя ракеты сярэдняй і малой далёкасці на вышынях да 35 кіламетраў.